Source :- SIRAJLIVE NEWS
ന്യൂഡല്‍ഹി | ഹരിയാനയില്‍ പൊള്ളലേറ്റ നിലയില്‍ കണ്ടെത്തിയ യുവഡോക്ടര്‍ ചികിത്സയിലിരിക്കെ മരിച്ചു.
ഡല്‍ഹിയില്‍ ബിരുദാനന്തര ബിരുദ പഠനത്തിന് തയാറെടുക്കുന്ന രാജസ്ഥാന്‍ സ്വദേശിനിയായ ഭാവന യാദവാണ്(25) മരിച്ചത്. ഹിസാറില്‍ വെച്ചാണ് ഭാവനക്ക് ഗുരുതരമായി പൊള്ളലേറ്റിരുന്നു.. മരണത്തില്‍ ദുരൂഹതകള്‍ ചൂണ്ടിക്കാട്ടി അമ്മ ഗായത്രി യാദവ് ജയ്പൂരില്‍ കേസ് ഫയല്‍ ചെയ്തിട്ടുണ്ട്.
2023-ല്‍ ഫിലിപ്പീന്‍സില്‍ നിന്നും മെഡിക്കല്‍ പഠനം പൂര്‍ത്തിയാക്കിയതാണ് ഭാവന യാദവ്. പിന്നീട് വിദേശത്ത് എംബിബിഎസ് ബിരുദം നേടിയ വിദ്യാര്‍ഥികള്‍ക്കായുള്ള നിര്‍ബന്ധിതമായ മെഡിക്കല്‍ ലൈസന്‍സിംഗ് പരീക്ഷയായ ഫോറിന്‍ മെഡിക്കല്‍ ഗ്രാജുവേറ്റ് പരീക്ഷയ്ക്ക് തയാറെടുക്കുകയായിരുന്നു ഭാവന യാദവ്.
പരീക്ഷയില്‍ പങ്കെടുക്കുന്നതിനായി ഏപ്രില്‍ 21ന് ഭാവന ഡല്‍ഹിയിലെത്തിയിരുന്നു. ഡല്‍ഹിയില്‍ സിവില്‍ സര്‍വീസ് പരീക്ഷയ്ക്ക് തയാറെടുക്കുന്ന സഹോദരിയോടൊപ്പമായിരുന്നു ഭാവന താമസിച്ചിരുന്നത്. ഏപ്രില്‍ 21, 22 തീയതികളില്‍ ഭാവന സഹോദരിക്കൊപ്പമുണ്ടായിരുന്നു. 23ന് ഭാവന അമ്മയെ വിളിച്ച് 24ന് രാവിലെ തിരിച്ചെത്തുമെന്ന് പറഞ്ഞിരുന്നു. എന്നാല്‍ എത്തിയില്ല. അന്വേഷണത്തിനിടെ ഏപ്രില്‍ 24ന്, ഉമേഷ് യാദവ് എന്നയാള്‍ അമ്മയെ വിളിച്ച് ഭാവനയ്ക്ക് പൊള്ളലേറ്റതായും ഹരിയാനയിലെ ഹിസാറിലെ സോണി ആശുപത്രിയില്‍ പ്രവേശിപ്പിച്ചതായും അറിയിച്ചു.ഗുരുതരാവസ്ഥയിലായ ഭാവനയെ ജയ്പൂരിലെ അമ്മയെത്തി എസ്എംഎസ് ആശുപത്രിയിലേക്ക് മാറ്റി.
ഏപ്രില്‍ 24ന് രാത്രി ചികിത്സയ്ക്കിടെ അവര്‍ മരിച്ചു. മകളുടെ വയറ്റില്‍ മൂര്‍ച്ചയേറിയ ആയുധം കൊണ്ടതിന്റെ പാടുകള്‍ ഉണ്ടായിരുന്നതായി അമ്മ പറയുന്നു. മകളെ കുത്തിക്കൊന്ന് തീകൊളുത്തിയതാണെന്നും ഇത് കൊലപാതകമാണെന്നും അമ്മ പരാതിയില്‍ പറയുന്നു.ഭാവനയുടെ ലാപ്ടോപ്പ്, മൊബൈല്‍ ഫോണ്‍, മറ്റ് വിലപിടിപ്പുള്ള വസ്തുക്കള്‍ എന്നിവ നഷ്ടപ്പെട്ടതായും അമ്മ പോലീസിനെ അറിയിച്ചു.
