‘కల్తీ పాలను కనిపెట్టండిలా’

పాలు కల్తీ ఒక తీవ్రమైన సమస్య.

కొంతమంది వ్యాపారులు, విక్రయదారులు లాభం కోసం పాలలో నీళ్లే కాదు, అవి చిక్కగా ఉన్నాయని చూపించడానికి నాసిరకం లేదా హానికరమైన పదార్థాలను కలుపుతారన్న ఆరోపణలున్నాయి.

రాజమహేంద్రవరంలో ఇటీవల వెలుగుచూసిన పాల కల్తీ వ్యవహారం ప్రజల్లో ఆందోళన కలిగించింది.

ఆరోగ్యానికి మంచివని భావించే పాలు తీరా మన చేతికి వచ్చేసరికి ఎంత నాణ్యతతో ఉన్నాయనే సందేహాలు తలెత్తాయి.

ఆ నేపథ్యంలో పాలు కల్తీ అయ్యాయో లేదో ఎలా గుర్తించాలి? ఇంట్లోనే ఎలాంటి పరీక్షలు చేయవచ్చు?

ఈ అంశాలపై ఫుడ్ సేఫ్టీ అండ్ స్టాండర్డ్స్ అథారిటీ ఆఫ్ ఇండియా (ఎఫ్ఎస్ఎస్ఏఐ) అధికారులతో పాటు డెయిరీ రంగంలో పనిచేస్తున్నవారితో బీబీసీ మాట్లాడింది.

‘పాలు పోషకాలతో కూడిన ద్రవ ఆహారం. శిశువులకు ఇది ప్రధాన పోషక వనరు. శరీర అభివృద్ధికి అవసరమైన ప్రోటీన్లు, కొవ్వులు, కాల్షియం వంటి పోషకాలు ఇందులో ఉంటాయి.

పాలలో కల్తీ చేయడం ఒక తీవ్రమైన సమస్య. ప్రధానంగా ఆర్థిక లాభం కోసం పాలలో నాసిరకం లేదా హానికర పదార్థాలను కలుపుతారు. వినియోగదారుల భద్రతను ప్రమాదంలో పెట్టే ఈ చర్యలు “ఆహార మోసం”గా పరిగణించవచ్చు’ అని ఎఫ్ఎస్ఎస్ఏఐ డిప్యూటీ డైరెక్టర్ సురేష్ ఉప్పరాపల్లి బీబీసీతో అన్నారు.

పాల కల్తీ చాలా రకాలుగా జరుగుతుందని.. కొన్ని సాధారణ పరీక్షలతో ఎవరైనా గుర్తించవచ్చని సురేష్ ఉప్పరాపల్లి చెప్పారు.

పాలలో నీరు, యూరియా, డిటర్జెంట్లు, ఫార్మలిన్, హైడ్రోజన్ పెరాక్సైడ్ వంటివి కలుపుతారు. పాల కల్తీ పలు రకాలుగా జరుగుతుందని ఆయన వివరించారు.

పాలలో కల్తీ ఉందా అని ఇంట్లో కూడా కొన్ని చిట్కాలతో అంచనా వేయవచ్చు.

ఇవి ప్రాథమిక సూచనలు మాత్రమే, ఖచ్చితమైన నిర్ధరణ కోసం ల్యాబ్ పరీక్షలు అవసరమని సురేష్ ఉప్పరాపల్లి చెప్పారు.

పాల కేంద్రాల్లో ఎక్కువగా లాక్టోమీటర్ అనే చిన్న పరికరం వాడటాన్ని చూస్తాం. లాక్టోమీటర్ అనేది పాల సాంద్రత కొలిచే సాధనం.

పాలలో నీరు కలిపితే సాంద్రత తగ్గుతుంది. కొన్ని ఘన పదార్థాలు కలిపితే సాంద్రత పెరుగుతుంది. ఈ మార్పుల ఆధారంగా పాల నాణ్యతపై ఒక ప్రాథమిక అంచనా వేస్తారు .

“లాక్టోమీటర్‌ను పాలలో ముంచి, తేలే స్థాయిని బట్టి పాల నాణ్యతను నిర్ధరిస్తారు. సాధారణంగా 20°C ఉష్ణోగ్రత వద్ద స్వచ్ఛమైన పాలుకి సుమారు 26-32 లాక్టోమీటర్ రీడింగ్ ఉండాలి. రీడింగ్ తక్కువగా ఉంటే నీరు కలిసినట్లు, రీడింగ్ ఎక్కువగా ఉంటే స్టార్చ్, యూరియా వంటి ఘన పదార్థాలు కలిశాయని అంచనా వేయవచ్చు” అని విశాఖ డెయిరీ, హెరీటేజ్ డెయిరీలలో పాల నాణ్యత నిర్ధరణ పరీక్షలు చేసే ఉద్యోగులు రమేష్, మురళి బీబీసీతో చెప్పారు.

“లాక్టోమీటరుతో త్వరగా ఫలితం తెలుస్తుంది. అయితే, కేవలం సాంద్రత మాత్రమే కొలుస్తుంది. పైగా రసాయనాల కల్తీని నేరుగా గుర్తించదు. లాక్టోమీటర్ పరీక్ష ఒక ప్రాథమిక సూచిక మాత్రమే. ఖచ్చితమైన నిర్ధరణ కోసం ప్రయోగశాలలో పరీక్షలు అవసరం” అని మురళి అన్నారు.

పాల నాణ్యతను పూర్తిగా నిర్ధరించేందుకు ఫ్యాట్, సాలిడ్స్-నాట్-ఫ్యాట్, మైక్రోబయాలజికల్ పరీక్షలు చేయించాల్సి ఉంటుందని రమేష్ చెప్పారు.

కల్తీ పాలను తాగినా, వాటితో తయారుచేసే పదార్థాలను తిన్నా ఆరోగ్యంపై దాని ప్రభావం ఉంటుందని సురేష్ ఉప్పరాపల్లి చెప్పారు.

పెరుగు, మజ్జిగ, పనీర్, నెయ్యి, ఐస్‌క్రీమ్, స్వీట్లు, పాలపొడి ఇలా అన్నింటిలో కల్తీ పదార్థాలు నిల్వ అవుతాయి.

దీనివల్ల జీర్ణ సమస్యలు, హానికర సూక్ష్మజీవుల పెరుగుదల, దీర్ఘకాలిక కిడ్నీ, కాలేయ సమస్యలు తలెత్తవచ్చు.

“పాలలో ఏదైనా కల్తీ జరిగిందనే అనుమానమోస్తే వాటిని ఉపయోగించవద్దు. ఒకవేళ తెలియక ఎవరైనా తీసుకుంటే, వారిలో వాంతులు, విరేచనాలు, తలనొప్పి లాంటి లక్షణాలు ఏమైనా ఉన్నాయేమో గమనించండి. పిల్లలు, గర్భిణులు అయితే వెంటనే వైద్యులను సంప్రదించాలి. ఇది మాత్రం ఖచ్చితంగా చేయాలి” అని సురేష్ ఉప్పరాపల్లి సూచించారు.

కల్తీ అయ్యాయనే అనుమానం ఉంటే ఆ పాలను సీల్ చేయాలని, స్థానిక ఫుడ్ ఇన్‌స్పెక్టర్‌కు ఫిర్యాదు చేయాలని ఆయన చెప్పారు.

వినియోగదారుల ఆరోగ్య భద్రతను ప్రమాదంలో పెట్టే కల్తీ చర్యలు “ఆహార మోసం”గా పరిగణించవచ్చని అన్నారు.

ఏదేమైనా, కల్తీలేని పాలను కొనుగోలు చేయడం, వాటి నాణ్యతను పరిశీలించుకోవడం, ఆహారభద్రతపై అవగాహన పెంచుకోవడం చాలా అవసరమని సూచిస్తున్నారు.

(బీబీసీ కోసం కలెక్టివ్ న్యూస్‌రూమ్ ప్రచురణ)