जम्मू-काश्मीरच्या पहलगाममध्ये पर्यटकांवर हल्ला, 20 हून अधिक जणांचा मृत्यू

जम्मू-काश्मीरमधील पहलगामच्या बैसर भागात पर्यटकांवर हल्ला झाला आहे. या हल्ल्यात आतापर्यंत 20 हून अधिक जणांचा मृत्यू झाला आहे, तर अनेकजण जखमी झाले आहेत.

मंगळवारी (22 एप्रिल) झालेल्या या हल्ल्यानंतर सुरक्षा दलांनी या परिसराला वेढा घातला. तसंच, वैद्यकीय टीमदेखील घटनास्थळी पोहोचली आहे.

या हल्ल्यातील जखमींना अनंतनागमधील सरकारी वैद्यकीय कॉलेजमध्ये दाखल करण्यात आलं आहे.

या हल्ल्याच्या घटनेनंतर भारताचे गृहमंत्री अमित शाह तातडीने जम्मू-काश्मीरमध्ये पोहोचले. जम्मू-काश्मीरचे नायब राज्यपाल मनोज सिन्हा आणि मुख्यमंत्री ओमर अब्दुल्लाह यांच्यासह अमित शाह यांनी सुरक्षाव्यवस्थेचा आढावा घेतला.

जम्मू-काश्मीरचे मुख्यमंत्री ओमर अब्दुल्लाह यांनी या घटनेनंतर ‘एक्स’ या सोशल मीडिया प्लॅटफॉर्मवर लिहिलंय की, “या घटनेमुळे मला धक्का बसला आहे. मला यावर विश्वास बसत नाही. आमच्या पर्यटकांवर झालेला हल्ला निषेधार्ह आहे. या हल्ल्यात मृत्यूमुखी पडलेल्यांची माहिती गोळा केली जात आहे.”

पहलगामला ‘भारताचं स्वित्झर्लंड’ म्हटलं जातं. इथं भारत आणि जगभरातून पर्यटक फिरण्यासाठी येत असतात.

अलीकडच्या काही वर्षांमध्ये सर्वसामान्य नागरिकांवर झालेला हा सर्वात मोठा हल्ला आहे.

बीबीसीचे प्रतिनिधी माजिद जहांगीर यांनी गुजरातमधून आलेल्या पर्यटकाशी बातचित केली. पर्यटकांच्या ज्या गटावर हल्ला झाला होता, त्या गटामध्येच हा पर्यटकदेखील होता.

या पर्यटकानं सांगितलं की, “अचानक हल्ला झाल्यामुळे तिथे गोंधळाचं वातावरण निर्माण झालं. प्रत्येकजण ओरडत, रडत तिथून पळू लागला.”

पहलगाममध्ये पर्यटकांवर झालेल्या दहशतवादी हल्ल्याच्या ठिकाणी महाराष्ट्रातील नागपूरचं एक कुटुंब उपस्थित होतं. हे कुटुंब जम्मू-काश्मीरमध्ये फिरण्यासाठी गेलं होतं.

एएनआय वृत्तसंस्थेशी बोलताना नागपूरच्या या कुटुंबाने आपला अनुभव सांगितला. ते म्हणाले, “आम्ही तिथे फिरायला गेलो होतो. तेथून बाहेर पडताना गोळीबारचा आवाज आमच्या कानावर पडला. या आवाजानं सर्वजण सैरावैरा पळायला लागले. आम्हीही मागे वळून न पाहता, तिथून कसंबसं बाहेर पडलो. या गोंधळात माझ्या पत्नीचा पाय फ्रॅक्चर झाला. सध्या तिच्यावर उपचार सुरु आहेत.”

पहलगाममधील हल्ल्याबाबत महाराष्ट्राचे मुख्यमंत्री यांनी माहिती देताना म्हटलं की, “पहलगाममध्ये झालेल्या भ्याड दहशतवादी हल्ल्ल्याचा मी तीव्र शब्दात निषेध करतो. या घटनेत जे लोक मृत्यूमुखी पडले, त्यांना भावपूर्ण श्रद्धांजली. त्यांच्या कुटुंबीयांच्या, आप्तस्वकियांच्या दु:खात आम्ही सहभागी आहोत. या घटनेत जे जखमी झाले, त्यांच्या प्रकृतीत लवकर सुधारणा व्हावी, अशी मी ईश्वरचरणी प्रार्थना करतो.”

यावेळी देवेंद्र फडणवीस यांनी महाराष्ट्रातील पर्यटकांबाबत माहिती दिली. फडणवीस म्हणाले, “जम्मू-काश्मीर प्रशासनातील वरिष्ठांच्या आम्ही संपर्कात आहोत. पहलगाम ज्यांच्या अखत्यारीत येते, ते काश्मीरचे विभागीय आयुक्त विजयकुमार बिदरी यांनाही फोन करुन माहिती घेतली. आतापर्यंत प्राप्त माहितीनुसार, महाराष्ट्रातील दोन पर्यटकाचा मृत्यू झाला असून, त्यात दिलीप डिसले, अतुल मोने असे दोघे आहेत.”