‘Y’ અને ‘U’ અક્ષરે ઉકેલ્યો પોલીસ અધિકારીની હત્યાનો કેસ, ઇન્સપેક્ટરે જ મૃત્યુ નિપજાવીને લાશના ટુકડા કર્યા હતા

તા. 11 એપ્રિલ 2016. આ દિવસે મહારાષ્ટ્ર પોલીસનાં મહિલા અધિકારી અશ્વિની બિંદ્રે-ગોરે ગુમ થઈ ગયાં હતાં. એ પછી જે વિગતો બહાર આવી તેણે સમગ્ર મહારાષ્ટ્રને હચમચાવી નાખ્યું, કારણ કે તેમની નૃશંસ હત્યાનો આરોપ સહકર્મી પોલીસ ઇન્સ્પેક્ટર અભય કુરુંદકર ઉપર લાગ્યો હતો.

અભય પ્રતિષ્ઠિત પોલીસ અધિકારી હોવાને કારણે ચકચાર મચી જવા પામી હતી. અભયને તેની સેવાઓ બદલ રાષ્ટ્રપતિ પદક પણ એનાયત કરવામાં આવ્યો હતો.

જેણે અશ્વિનીના શરીરના ટુકડેટુકડા કરીને તેને ટ્રંક ભરીને વસઈની ક્રિકમાં નાખી દીધી હતી. તપાસ કરનારી પોલીસ હત્યા માટે વપરાયેલું હથિયાર અને મૃતદેહ શોધી શકી ન હતી, છતાં અદાલતે અભય કુરુંદકરને દોષિત જાહેર કર્યો છે.

અશ્વિની ગુમ થયાંના બરાબર નવ વર્ષ પછી તા. 11 એપ્રિલના રોજ અભય કુરુંદકર તથા અન્ય બે સહઆરોપીઓને પનવેલની કોર્ટ દ્વારા સજા સંભળાવવામાં આવશે.

અશ્વિની સાથે અણબનાવ હોવા છતાં તેને ન્યાય મળે તે માટે સંઘર્ષ કરનાર પતિ અને પરિવારજનો, નિયમિત ફી ન મળવા છતાં કેસ રજૂ કરનાર સરકારી વકીલની અસરકારક અને ધારદાર દલીલો તથા તપાસનીશ મહિલા પોલીસ અધિકારીને કારણે કોર્ટે અભય કુરુંદકરને દોષિત જાહેર કરેલ છે.

અશ્વિની બિદ્રે-ગોરેની હત્યા કેવી રીતે થઈ હતી અને પોલીસે કેવી રીતે તપાસ હાથ ધરી તથા કેવી રીતે વૉટ્સઍપ મૅસેજમાં ‘Y’ અને ‘U’ એમ બે અક્ષરના ઉપયોગે પોલીસને કેસ ઉકેલવામાં મદદ કરી હતી.

અશ્વિનીનો જન્મ કોલ્હાપુરના એક ગામડાંમાં થયો હતો. વર્ષ 2005માં રાજૂ ગોરે સાથે તેમનાં લગ્ન થયાં. અશ્વિની લગ્ન પહેલાંથી જ સ્પર્ધાત્મક પરીક્ષાઓ માટે તૈયારી કરતાં હતાં. લગ્નનાં એક જ વર્ષની અંદર તેમને પોલીસની પરીક્ષા પાસ કરી અને સબ-ઇન્સ્પેક્ટર બન્યાં.

પ્રારંભિક પોસ્ટિંગ્સ દરમિયાન અશ્વિનીની મુલાકાત વરિષ્ઠ પોલીસ અધિકારી અભય કુરુંદકર સાથે થઈ હતી. વર્ષ 2013માં અશ્વિનીને પ્રમોશન મળ્યું અને તેમને રત્નાગિરિમાં પોસ્ટિંગ મળ્યું. આ ગાળામાં અશ્વિની અને અભયની વચ્ચે નિકટતા વધી હતી.

અભય વારંવાર અશ્વિનીને મળવા આવતા, એટલે અશ્વિનીના પતિ અને તેમના પિતાને સમગ્ર ઘટના જાણમાં આવી હતી.

ટૂંક સમયમાં તેઓ લાપતા થયાં હતાં અને તેમની હત્યા થઈ હોવાનું બહાર આવ્યું હતું.

અશ્વિની બિદ્રે-ગોરે નવી મુંબઈના કલંબોલીમાંથી ગુમ થયાં હતાં. તેમના પરિવારજનોએ આરોપ મૂક્યો હતો કે વરિષ્ઠ પોલીસ અધિકારી અભય કુરુંદકરે તેમને ગુમ કર્યાં છે. શરૂઆતમાં પરિવાજનોએ આરોપ મૂક્યો હતો કે આરોપી વિભાગનો જ અધિકારી હોવાને કારણે પોલીસ યોગ્ય રીતે તપાસ નથી કરી રહી.

ઇન્સ્પેક્ટર અભય કુરુંદકરના નાનપણના મિત્ર મહેશ ફલસીકરે અશ્વિનીની હત્યાની વાત કબૂલી હતી.

અશ્વિવનીની હત્યા કર્યા બાદ તેમના મૃતદેહના લાકડાં કાપવાની આરીથી કટકા કરી નાખવામાં આવ્યા હતા એ પછી તેમનાં મૃતદેહને વસઈની ખાડીમાં ફેંકી દેવાયો હતો.