Source :- SIRAJLIVE NEWS
കൊച്ചി| ശബരിമല സ്വര്ണക്കൊള്ള കേസില് നടന് ജയറാമിന് ഇഡി സമന്സ്. ജയറാമിനോട് അടുത്ത ചൊവ്വാഴ്ച ഹാജരാകാനാണ് നിര്ദേശം. കേസിലെ ഒന്നാം പ്രതി ഉണ്ണികൃഷ്ണന് പോറ്റിയുമായുള്ള ബന്ധത്തില് ഇഡി വ്യക്തത തേടും. നേരത്തെ കേസുമായി ബന്ധപ്പെട്ട് ജയറാമിനെ പ്രത്യേക അന്വേഷണസംഘം (എസ്ഐടി) ചോദ്യം ചെയ്തിരുന്നു.
ജയറാമും ഉണ്ണികൃഷ്ണന് പോറ്റിയും ചേര്ന്ന് പൂജ നടത്തുന്ന വിഡിയോ ദൃശ്യങ്ങള് പുറത്തുവന്ന സാഹചര്യത്തിലാണ് ഇഡിയുടെ ചോദ്യം ചെയ്യാനുള്ള നടപടി. ക്ഷേത്രത്തിലെ ദ്വരപാലക ശില്പങ്ങള് ജയറാമിന്റെ വീട്ടില് എത്തിച്ച് അവിടെ വച്ച് പൂജ നടത്തിയിരുന്നു. ഇത്തരത്തില് പൂജ നടത്തില് വീട്ടില് ഐശ്വര്യം വരുമെന്ന് ഉണ്ണികൃഷ്ണന് പോറ്റി പറഞ്ഞതിന്റെ അടിസ്ഥാനത്തിലാണ് വീട്ടില് പൂജ നടത്തിയതെന്നായിരുന്നു ജയറാം പറഞ്ഞത്.
ഉണ്ണികൃഷ്ണന് പോറ്റിയുടെ സാമ്പത്തിക ഇടപാടോ, തട്ടിപ്പോ സംബന്ധിച്ച് അറിയില്ല. താനൊരു കടുത്ത അയ്യപ്പ ഭക്തനാണ്. എല്ലാ വര്ഷവും ശബരിമലയില് പോകാറുണ്ട്. അവിടെ വെച്ചാണ് ഉണ്ണികൃഷണന് പോറ്റിയെ പരിചയപ്പെടുന്നതെന്നുമായിരുന്നു ജയറാം എസ്ഐടിക്ക് നല്കിയ മൊഴി. അതേസമയം, ശബരിമല സ്വര്ണക്കൊള്ള കേസില് അടുത്തിടെ ഉണ്ണികൃഷ്ണന് പോറ്റിക്ക് കോടതി ജാമ്യം അനുവദിച്ചിരുന്നു.
