Source :- BBC PUNJABI
ਤਸਵੀਰ ਸਰੋਤ, Getty Images
36 ਮਿੰਟ ਪਹਿਲਾਂ
ਕਈ ਏਸ਼ੀਆਈ ਦੇਸ਼ਾਂ ਵਿੱਚ ਇੱਕ ਵਾਰ ਫਿਰ ਕੋਰੋਨਾ-19 ਦੇ ਨਵੇਂ ਮਾਮਲੇ ਵੱਧ ਰਹੇ ਹਨ। ਹਾਲਾਂਕਿ, ਭਾਰਤ ਵਿੱਚ ਸਥਿਤੀ ਕਾਬੂ ਵਿੱਚ ਦੱਸੀ ਜਾ ਰਹੀ ਹੈ।
ਸਿੰਗਾਪੁਰ ਵਿੱਚ, 27 ਅਪ੍ਰੈਲ ਤੋਂ 3 ਮਈ 2025 ਦੇ ਹਫ਼ਤੇ ਵਿੱਚ, ਸਿਹਤ ਮੰਤਰਾਲੇ ਨੇ ਦੱਸਿਆ ਕਿ 14,200 ਨਵੇਂ ਕੇਸ ਸਾਹਮਣੇ ਆਏ ਹਨ। ਜਦੋਂ ਕਿ ਪਿਛਲੇ ਹਫ਼ਤੇ 11,100 ਮਾਮਲੇ ਸਾਹਮਣੇ ਆਏ ਸਨ।
ਥਾਈਲੈਂਡ ਅਤੇ ਹਾਂਗਕਾਂਗ ਤੋਂ ਇਲਾਵਾ, ਪਿਛਲੇ ਕੁਝ ਮਹੀਨਿਆਂ ਵਿੱਚ ਚੀਨ ਵਿੱਚ ਕੋਰੋਨਾ ਦੇ ਮਾਮਲਿਆਂ ਵਿੱਚ ਵਾਧਾ ਦਰਜ ਕੀਤਾ ਗਿਆ ਹੈ।
ਸਿਹਤ ਮਾਹਰ ਕੋਰੋਨਾ ਦੇ ਮਾਮਲਿਆਂ ਵਿੱਚ ਤੇਜ਼ੀ ਨਾਲ ਵਾਧੇ ਲਈ ਕੋਰੋਨਾ ਦੇ ਓਮੀਕਰੋਨ ਵੇਰੀਐਂਟ ਦੇ ਸਬਵੇਰੀਐਂਟ ਜੇਐੱਨ.1 ਨੂੰ ਜ਼ਿੰਮੇਵਾਰ ਦੱਸ ਰਹੇ ਹਨ।
ਭਾਰਤ ਸਰਕਾਰ ਦੇ ਸਿਹਤ ਅਤੇ ਪਰਿਵਾਰ ਭਲਾਈ ਮੰਤਰਾਲੇ ਦੇ ਡੈਸ਼ਬੋਰਡ ਦੇ ਮੁਤਾਬਕ, ਭਾਰਤ ਵਿੱਚ ਇਸ ਸਮੇਂ ਕੋਰੋਨਾ ਵਾਇਰਸ ਦੇ 257 ਸਰਗਰਮ ਮਾਮਲੇ ਹਨ। ਇਨ੍ਹਾਂ ਵਿੱਚੋਂ 53 ਮਾਮਲੇ ਮੁੰਬਈ ਵਿੱਚ ਹਨ।
ਜੇਐੱਨ.1 ਕੀ ਹੈ?
ਤਸਵੀਰ ਸਰੋਤ, Getty Images
ਇਕਨਾਮਿਕ ਟਾਈਮਜ਼ ਦੀ ਰਿਪੋਰਟ ਦੇ ਮੁਤਾਬਕ, ਸਿੰਗਾਪੁਰ ਵਿੱਚ ਹੁਣ ਤੱਕ ਜਿਨ੍ਹਾਂ ਨਮੂਨਿਆਂ ਦੀ ਜੀਨੋਮ ਸੀਕੁਐਂਸਿੰਗ ਕੀਤੀ ਗਈ ਹੈ, ਉਨ੍ਹਾਂ ਵਿੱਚੋਂ ਜ਼ਿਆਦਾਤਰ ਕੇਸ ਜੇਐੱਨ.1 ਵੇਰੀਐਂਟ ਦੇ ਹਨ।
ਹਾਲਾਂਕਿ, ਜੇਐੱਨ.1 ਵੇਰੀਐਂਟ ਪੂਰੀ ਤਰ੍ਹਾਂ ਨਵਾਂ ਨਹੀਂ ਹੈ ਪਰ ਇਹ ਓਮੀਕਰੋਨ ਦਾ ਇੱਕ ਉਪ-ਵੇਰੀਐਂਟ ਹੈ, ਜੋ ਕਿ ਲੰਬੇ ਸਮੇਂ ਤੋਂ ਦੁਨੀਆ ਭਰ ਵਿੱਚ ਫੈਲਿਆ ਹੋਇਆ ਸੀ।
ਆਲ ਇੰਡੀਆ ਇੰਸਟੀਚਿਊਟ ਆਫ਼ ਮੈਡੀਕਲ ਸਾਇੰਸਜ਼ (ਏਮਜ਼), ਦਿੱਲੀ ਦੇ ਕਮਿਊਨਿਟੀ ਮੈਡੀਸਨ ਵਿਭਾਗ ਦੇ ਪ੍ਰੋਫ਼ੈਸਰ ਡਾਕਟਰ ਸੰਜੇ ਰਾਏ, ਕੋਵਿਡ ਟੀਕੇ (ਕੋ-ਵੈਕਸਿਨ) ਦੇ ਟ੍ਰਾਇਲ ਦੇ ਤਿੰਨੋਂ ਪੜਾਵਾਂ ਦੇ ਮੁੱਖ ਖੋਜਕਰਤਾ ਸਨ।
ਬੀਬੀਸੀ ਪੱਤਰਕਾਰ ਚੰਦਨ ਜਾਜਵਾਰੇ ਨੇ ਕੋਰੋਨਾ ਵਾਇਰਸ ਦੇ ਇਸ ਨਵੇਂ ਰੂਪ ਬਾਰੇ ਡਾਕਟਰ ਸੰਜੇ ਰਾਏ ਨਾਲ ਗੱਲ ਕੀਤੀ।
ਉਹ ਕਹਿੰਦੇ ਹਨ, “ਜੇਐੱਨ.1, ਕੋਰੋਨਾ ਦੇ ਓਮੀਕਰੋਨ ਵਾਇਰਸ ਦਾ ਇੱਕ ਰੂਪ ਹੈ। ਇਸਦੀ ਪਛਾਣ ਹੋਏ ਇੱਕ ਸਾਲ ਤੋਂ ਵੱਧ ਸਮਾਂ ਹੋ ਗਿਆ ਹੈ। ਅਜਿਹਾ ਨਹੀਂ ਹੈ ਕਿ ਇਹ ਕੋਈ ਨਵਾਂ ਵਾਇਰਸ ਹੈ। ਅਸੀਂ ਇਸ ਦੇ ਪ੍ਰਭਾਵਾਂ ਬਾਰੇ ਗੰਭੀਰਤਾ ਨਾਲ ਸਭ ਕੁਝ ਜਾਣਦੇ ਹਾਂ।”
ਉਹ ਕਹਿੰਦੇ ਹਨ, “ਇਸ ਵੇਲੇ ਜੇਐੱਨ.1 ਵੇਰੀਐਂਟ ਤੋਂ ਡਰਨ ਦੀ ਕੋਈ ਲੋੜ ਨਹੀਂ ਹੈ। ਇਸਦਾ ਕੋਈ ਸਬੂਤ ਵੀ ਨਹੀਂ ਹੈ। ਇਸ ਸਮੇਂ ਸਾਡੇ ਕੋਲ ਜੋ ਸਬੂਤ ਹਨ, ਉਨ੍ਹਾਂ ਮੁਤਾਬਕ ਇਹ ਆਮ ਜ਼ੁਕਾਮ ਵਰਗਾ ਜਾਂ ਉਸ ਤੋਂ ਵੀ ਕਮਜ਼ੋਰ ਹੋ ਸਕਦਾ ਹੈ।”
ਮਾਹਰਾਂ ਦੀ ਕੀ ਸਲਾਹ ਹੈ?
ਤਸਵੀਰ ਸਰੋਤ, Getty Images
ਸੰਜੇ ਰਾਏ ਕਹਿੰਦੇ ਹਨ, “ਆਮ ਜ਼ੁਕਾਮ ਵੀ ਇੱਕ ਕੋਰੋਨਾਵਾਇਰਸ ਹੈ, ਯਾਨੀ ਇਹ ਇੱਕੋ ਵਾਇਰਸ ਫ਼ੈਮਿਲੀ ਨਾਲ ਸਬੰਧਤ ਹੈ। ਕੋਰੋਨਾਵਾਇਰਸ ਦੇ ਹਜ਼ਾਰਾਂ ਫ਼ੈਮਿਲੀ ਵੇਰੀਐਂਟ ਹਨ, ਪਰ ਸਿਰਫ਼ ਸੱਤ ਹੀ ਮਨੁੱਖਾਂ ਵਿੱਚ ਸਮੱਸਿਆਵਾਂ ਪੈਦਾ ਕਰਦੇ ਹਨ, ਜਿਨ੍ਹਾਂ ਵਿੱਚੋਂ ਚਾਰ ਪਹਿਲਾਂ ਹੀ ਮੌਜੂਦ ਸਨ, ਜੋ ਆਮ ਜ਼ੁਕਾਮ ਨਾਲ ਸਬੰਧਤ ਸਨ।”
“ਇਸ ਤੋਂ ਬਾਅਦ, 2003-04 ਵਿੱਚ ਚੀਨ ਤੋਂ ਸਾਰਸ-1 ਆਇਆ। ਸਾਲ 2012-13 ਵਿੱਚ ਮਿਡਲ ਈਸਟ ਰੈਸਪੀਰੇਟਰੀ ਸਿੰਡਰੋਮ (ਐੱਮਈਆਰਐੱਸ) ਮੱਧ ਪੂਰਬ ਤੋਂ ਆਇਆ। ਇਸ ਤੋਂ ਬਾਅਦ, 2019 ਵਿੱਚ ਕੋਰੋਨਾਵਾਇਰਸ-2 ਆਇਆ, ਜਿਸਨੂੰ ਅਸੀਂ ਕੋਵਿਡ-19 ਵਜੋਂ ਜਾਣਦੇ ਹਾਂ।”
ਸੰਜੇ ਰਾਏ ਮੁਤਾਬਕ, ਜੇਕਰ ਕਿਸੇ ਨੂੰ ਵੀ ਆਮ ਜ਼ੁਕਾਮ ਹੁੰਦਾ ਹੈ, ਤਾਂ ਇਹ ਉਸਦੇ ਘਰ ਦੇ ਸਾਰੇ ਮੈਂਬਰਾਂ ਨੂੰ ਹੋ ਸਕਦਾ ਹੈ, ਪਰ ਇਹ ਇੰਨਾ ਗੰਭੀਰ ਨਹੀਂ ਹੈ ਕਿ ਇਸ ਨਾਲ ਮੌਤ ਹੋ ਸਕਦੀ ਹੈ, ਕੋਰੋਨਾ ਵੀ ਇਸੇ ਤਰ੍ਹਾਂ ਦਾ ਹੋ ਗਿਆ ਹੈ।
ਸਿੰਗਾਪੁਰ ਦੇ ਸਿਹਤ ਮੰਤਰਾਲੇ ਮੁਤਾਬਕ, “ਵਰਤਮਾਨ ਵਿੱਚ, ਐੱਲਐੱਫ਼.7 ਅਤੇ ਐੱਨਬੀ.1.8 (ਜੇਐੱਨ.1 ਦੇ ਉਪ-ਰੂਪ) ਸਿੰਗਾਪੁਰ ਵਿੱਚ ਫ਼ੈਲ ਰਹੇ ਕੋਵਿਡ-19 ਦੇ ਮੁੱਖ ਰੂਪ ਹਨ।”
“ਹੁਣ ਤੱਕ ਜਿਨ੍ਹਾਂ ਮਾਮਲਿਆਂ ਦਾ ਜੀਨੋਮ ਸੀਕੁਐਂਸਿੰਗ ਕੀਤਾ ਗਿਆ ਹੈ, ਉਨ੍ਹਾਂ ਵਿੱਚੋਂ ਦੋ-ਤਿਹਾਈ ਇਸ ਨਾਲ ਸਬੰਧਤ ਹਨ। ਜੇਐੱਨ.1 ਵੀ ਉਹ ਰੂਪ ਹੈ ਜਿਸਦੀ ਵਰਤੋਂ ਮੌਜੂਦਾ ਕੋਵਿਡ-19 ਟੀਕੇ ਦੇ ਨਿਰਮਾਣ ਵਿੱਚ ਕੀਤੀ ਗਈ ਹੈ।”
ਮਾਹਰਾਂ ਦਾ ਕਹਿਣਾ ਹੈ ਕਿ ਇਹ ਵੇਰੀਐਂਟ ਪਹਿਲਾਂ ਵਾਲੇ ਵੇਰੀਐਂਟ ਦੇ ਮੁਕਾਬਲੇ ਲੋਕਾਂ ਨੂੰ ਗੰਭੀਰ ਰੂਪ ਵਿੱਚ ਬਿਮਾਰ ਨਹੀਂ ਕਰੇਗਾ ਪਰ ਇਸਦਾ ਤੇਜ਼ੀ ਨਾਲ ਫ਼ੈਲਣਾ ਚਿੰਤਾ ਦਾ ਵਿਸ਼ਾ ਹੈ।
ਹਾਲਾਂਕਿ, ਡਾਕਟਰ ਸੰਜੇ ਰਾਏ ਕਹਿੰਦੇ ਹਨ, “ਜ਼ੁਕਾਮ ਅਤੇ ਫਲੂ ਵਾਂਗ, ਇਹ ਸਿਰਫ਼ ਇੱਕ ਵਾਰ ਨਹੀਂ ਹੁੰਦਾ, ਇਹ ਕਈ ਵਾਰ ਹੋ ਸਕਦਾ ਹੈ। ਕੋਰੋਨਾ ਦੇ ਵੀ 10,000 ਰੂਪ ਹਨ ਅਤੇ ਇਹ ਪੂਰੀ ਤਰ੍ਹਾਂ ਬਦਲ ਗਿਆ ਹੈ।”
“ਜਦੋਂ ਅਸੀਂ ਕੋਵਿਡ ਦੇ ਸਮੇਂ ਦੌਰਾਨ ਇੱਕ ਸਰਵੇਖਣ ਕੀਤਾ, ਤਾਂ ਅਸੀਂ ਪਾਇਆ ਕਿ ਤਕਰੀਬਨ ਹਰ ਕਿਸੇ ਵਿੱਚ ਐਂਟੀਬਾਡੀਜ਼ ਵਿਕਸਤ ਹੋ ਗਏ ਸਨ, ਯਾਨੀ ਲਗਭਗ ਹਰ ਕੋਈ ਕਦੇ ਨਾ ਕਦੇ ਕੋਵਿਡ ਤੋਂ ਪੀੜਤ ਹੋ ਚੁੱਕਿਆ ਸੀ।”
ਕੋਰੋਨਾ ਦੇ ਤਾਜ਼ਾ ਮਾਮਲਿਆਂ ਵਿੱਚ, ਕੁਝ ਲੋਕਾਂ ਨੂੰ ਹਸਪਤਾਲ ਵਿੱਚ ਦਾਖਲ ਕਰਵਾਉਣ ਦੀਆਂ ਖ਼ਬਰਾਂ ਸਾਹਮਣੇ ਆਈਆਂ ਹਨ।
ਮਹਾਰਾਸ਼ਟਰ ਦੇ ਸਿਹਤ ਮੰਤਰੀ ਪ੍ਰਕਾਸ਼ ਅਬਿਤਕਰ ਨੇ ਕਿਹਾ ਹੈ ਕਿ ਮੁੰਬਈ ਦੇ ਇੱਕ ਹਸਪਤਾਲ ਵਿੱਚ ਦੋ ਕੋਰੋਨਾ ਮਰੀਜ਼ ਦਾਖਲ ਹਨ ਪਰ ਇਸ ਤੋਂ ਡਰਨ ਦੀ ਕੋਈ ਲੋੜ ਨਹੀਂ ਹੈ।
ਸੰਜੇ ਰਾਏ ਕਹਿੰਦੇ ਹਨ ਕਿ ਜੇਕਰ ਕਿਸੇ ਨੂੰ ਆਮ ਜ਼ੁਕਾਮ ਵੀ ਹੈ, ਤਾਂ ਉਸਨੂੰ ਹਸਪਤਾਲ ਵਿੱਚ ਦਾਖਲ ਕਰਵਾਉਣਾ ਪੈ ਸਕਦਾ ਹੈ।
ਜੇਐੱਨ.1 ਦੇ ਲੱਛਣ ਅਤੇ ਭਾਰਤ ਦੀ ਤਿਆਰੀ
ਤਸਵੀਰ ਸਰੋਤ, Getty Images
ਕੋਰੋਨਾ ਵਾਇਰਸ ਦੇ ਇਸ ਰੂਪ ਦੇ ਲੱਛਣ ਵੀ ਓਮੀਕਰੋਨ ਵੇਰੀਐਂਟ ਤੋਂ ਬਹੁਤੇ ਵੱਖਰੇ ਨਹੀਂ ਹਨ।
ਇਸ ਨਾਲ ਸੰਕਰਮਿਤ ਮਰੀਜ਼ਾਂ ਵਿੱਚ ਗਲੇ ਵਿੱਚ ਖਰਾਸ਼, ਥਕਾਵਟ, ਸਿਰ ਦਰਦ ਅਤੇ ਖੰਘ ਆਦਿ ਲੱਛਣ ਦਿਖਾਈ ਦਿੰਦੇ ਹਨ।
ਹਾਲਾਂਕਿ, ਇਹ ਲੱਛਣ ਬਹੁਤ ਸਾਰੇ ਲੋਕਾਂ ਦੀ ਸਿਹਤ ਅਤੇ ਇਮਿਊਨ ਸਿਸਟਮ ‘ਤੇ ਵੀ ਨਿਰਭਰ ਕਰਦੇ ਹਨ। ਪਰ ਜੇਐੱਨ.1 ਦੇ ਕੁਝ ਮੁੱਖ ਲੱਛਣਾਂ ਵਿੱਚ ਦਸਤ ਜਾਂ ਸਿਰ ਦਰਦ ਸ਼ਾਮਲ ਹਨ।
ਨਿਊਜ਼ ਏਜੰਸੀ ਪੀਟੀਆਈ ਦੇ ਮੁਤਾਬਕ, ਸਿੰਗਾਪੁਰ ਅਤੇ ਹਾਂਗਕਾਂਗ ਵਿੱਚ ਵੱਧ ਰਹੇ ਮਾਮਲਿਆਂ ਦੇ ਮੱਦੇਨਜ਼ਰ, ਸੋਮਵਾਰ ਨੂੰ ਭਾਰਤ ਵਿੱਚ ਸਿਹਤ ਸੇਵਾਵਾਂ ਦੇ ਡਾਇਰੈਕਟਰ ਜਨਰਲ ਦੀ ਅਗਵਾਈ ਵਿੱਚ ਇੱਕ ਉੱਚ-ਪੱਧਰੀ ਮੀਟਿੰਗ ਹੋਈ ਹੈ।
ਮੀਟਿੰਗ ਵਿੱਚ ਕੌਮੀ ਰੋਗ ਨਿਯੰਤਰਣ ਕੇਂਦਰ, ਐਮਰਜੈਂਸੀ ਮੈਡੀਕਲ ਰਾਹਤ ਵਿਭਾਗ, ਆਫ਼ਤ ਪ੍ਰਬੰਧਨ ਸੈੱਲ, ਭਾਰਤੀ ਮੈਡੀਕਲ ਖੋਜ ਪ੍ਰੀਸ਼ਦ ਅਤੇ ਕੇਂਦਰ ਸਰਕਾਰ ਦੇ ਹਸਪਤਾਲਾਂ ਦੇ ਮਾਹਰਾਂ ਨੇ ਹਿੱਸਾ ਲਿਆ।
ਇੱਕ ਅਧਿਕਾਰਤ ਸਰੋਤ ਦੇ ਹਵਾਲੇ ਨਾਲ, ਪੀਟੀਆਈ ਨੇ ਰਿਪੋਰਟ ਕੀਤਾ ਹੈ , “ਮੀਟਿੰਗ ਇਸ ਨੁਕਤੇ ‘ਤੇ ਸਮਾਪਤ ਹੋਈ ਕਿ ਭਾਰਤ ਵਿੱਚ ਕੋਰੋਨਾ-19 ਦੀ ਮੌਜੂਦਾ ਸਥਿਤੀ ਕਾਬੂ ਵਿੱਚ ਹੈ।”
“19 ਮਈ, 2025 ਤੱਕ, ਭਾਰਤ ਵਿੱਚ ਕੋਵਿਡ-19 ਦੇ 257 ਮਾਮਲੇ ਦਰਜ ਹੋਏ, ਜੋ ਕਿ ਦੇਸ਼ ਦੀ ਵੱਡੀ ਆਬਾਦੀ ਨੂੰ ਦੇਖਦੇ ਹੋਏ ਬਹੁਤ ਘੱਟ ਗਿਣਤੀ ਹੈ। ਇਨ੍ਹਾਂ ਵਿੱਚੋਂ ਕੋਈ ਵੀ ਮਾਮਲਾ ਬਹੁਤ ਗੰਭੀਰ ਨਹੀਂ ਹੈ, ਕਿਸੇ ਨੂੰ ਵੀ ਹਸਪਤਾਲ ਵਿੱਚ ਭਰਤੀ ਹੋਣ ਦੀ ਲੋੜ ਨਹੀਂ ਹੈ।”
ਬੀਬੀਸੀ ਲਈ ਕਲੈਕਟਿਵ ਨਿਊਜ਼ਰੂਮ ਵੱਲੋਂ ਪ੍ਰਕਾਸ਼ਿਤ
source : BBC PUNJABI
