Source :- SIRAJLIVE NEWS
അബൂദബി|യുണൈറ്റഡ് അറബ് എമിറേറ്റ്സിന് നേരെ ഇറാൻ നടത്തിയ വ്യാപകമായ വ്യോമാക്രമണത്തെ പ്രതിരോധ സംവിധാനങ്ങൾ ഉപയോഗിച്ച് വിജയകരമായി പ്രതിരോധിച്ചതായി യുഎഇ പ്രതിരോധ മന്ത്രാലയം അറിയിച്ചു. നൂറുകണക്കിന് ബാലസ്റ്റിക് മിസൈലുകളും ഡ്രോണുകളും ക്രൂയിസ് മിസൈലുകളും ഉൾപ്പെട്ട വൻ ആക്രമണമാണ് രാജ്യം നേരിട്ടത്. ആക്രമണത്തിൽ മൂന്ന് പേർ കൊല്ലപ്പെടുകയും 68 പേർക്ക് നിസ്സാര പരുക്കേൽക്കുകയും ചെയ്തതായി ഔദ്യോഗിക കണക്കുകൾ വ്യക്തമാക്കുന്നു.
പ്രതിരോധത്തിൻ്റെ കണക്കുകൾ
ഇറാൻ്റെ ഭാഗത്തുനിന്നുണ്ടായ ആക്രമണത്തിൻ്റെ തോത് വ്യക്തമാക്കുന്ന കണക്കുകൾ മന്ത്രാലയം പുറത്തുവിട്ടു. ആകെ 174 ബാലസ്റ്റിക് മിസൈലുകളാണ് യുഎഇ ലക്ഷ്യമാക്കി തൊടുത്തുവിട്ടത്. ഇതിൽ 161 എണ്ണവും വ്യോമപ്രതിരോധ സംവിധാനങ്ങൾ ആകാശത്തുവെച്ച് തന്നെ തകർത്തു. ബാക്കി 13 മിസൈലുകൾ ജനവാസ മേഖലകളിൽ എത്തുന്നതിന് മുൻപ് കടലിൽ പതിച്ചു. ആകെ 689 ഡ്രോണുകളെ(UAV)യാണ് മന്ത്രാലയം നിരീക്ഷിച്ചത്. ഇതിൽ 645 എണ്ണവും വിജയകരമായി തകർത്തു. എന്നാൽ 44 ഡ്രോണുകൾ രാജ്യത്തിൻ്റെ വിവിധ ഭാഗങ്ങളിൽ പതിച്ചു. കണ്ടെത്തിയ 8 ക്രൂയിസ് മിസൈലുകളും വെടിവച്ചിട്ടു. ഇവയിൽ ചിലത് പതിച്ചതിനെത്തുടർന്ന് പരിമിതമായ നാശനഷ്ടങ്ങൾ റിപ്പോർട്ട് ചെയ്തിട്ടുണ്ട്.
നാശനഷ്ടങ്ങളും ആഘാതവും
മിസൈലുകളും ഡ്രോണുകളും തകർക്കുന്നതിനിടെ ചിതറിത്തെറിച്ച അവശിഷ്ടങ്ങൾ വീണാണ് സിവിലിയൻ കേന്ദ്രങ്ങളിൽ നാശനഷ്ടങ്ങളുണ്ടായത്. മിക്ക നാശനഷ്ടങ്ങളും ചെറുതും ഇടത്തരവുമാണെന്ന് മന്ത്രാലയം അറിയിച്ചു. രാജ്യത്തിൻ്റെ വിവിധ ഭാഗങ്ങളിൽ കേട്ട ഉഗ്രസ്ഫോടന ശബ്ദങ്ങൾ മിസൈലുകളെ പ്രതിരോധ സംവിധാനങ്ങളും യുദ്ധവിമാനങ്ങളും ചേർന്ന് തകർക്കുമ്പോൾ ഉണ്ടായതാണെന്ന് അധികൃതർ വ്യക്തമാക്കി.
ശക്തമായ അപലപനം, തിരിച്ചടിക്ക് മുന്നറിയിപ്പ്
ഇറാൻ്റെ നടപടി രാജ്യത്തിൻ്റെ പരമാധികാരത്തിന്മേലുള്ള കടന്നുകയറ്റവും അന്താരാഷ്ട്ര നിയമങ്ങളുടെ നഗ്നമായ ലംഘനവുമാണെന്ന് പ്രതിരോധ മന്ത്രാലയം കുറ്റപ്പെടുത്തി.
“യുഎഇയുടെ സുരക്ഷയിലും സുസ്ഥിരതയിലും യാതൊരു വിട്ടുവീഴ്ചയുമുണ്ടാകില്ല. ഈ പ്രകോപനപരമായ ആക്രമണത്തിന് മറുപടി നൽകാൻ രാജ്യത്തിന് പൂർണ്ണ അവകാശമുണ്ട്. പൗരന്മാരെയും താമസക്കാരെയും തന്ത്രപ്രധാനമായ ആസ്തികളെയും സംരക്ഷിക്കാൻ ആവശ്യമായ എല്ലാ നടപടികളും സ്വീകരിക്കും,” മന്ത്രാലയം പ്രസ്താവനയിൽ വ്യക്തമാക്കി.
ജാഗ്രത തുടരുന്നു
ഏത് തരത്തിലുള്ള വെല്ലുവിളികളെയും നേരിടാൻ സൈന്യം പൂർണ്ണ സജ്ജമാണെന്നും എല്ലാ സുരക്ഷാ ഏജൻസികളും അതീവ ജാഗ്രതയിലാണെന്നും അധികൃതർ അറിയിച്ചു. പൗരന്മാരുടെയും സന്ദർശകരുടെയും സുരക്ഷയ്ക്കാണ് പ്രഥമ പരിഗണനയെന്നും മന്ത്രാലയം കൂട്ടിച്ചേർത്തു.
