ગુજરાત બજેટ 2026 : ગાંધીનગર-કલોલને ટ્વિન સિટી તરીકે વિકસાવાશે, જાણો તમામ મહત્ત્વની જાહેરાત

અપડેટેડ એક કલાક પહેલા

બુધવારે ગુજરાતના નાણામંત્રી કનુભાઈ દેસાઈએ ભૂપેન્દ્ર પટેલ સરકારનું સળંગ પાંચમું બજેટ રજૂ કર્યું હતું.

બજેટ ભાષણમાં તેમણે ચાલુ વર્ષને ‘પ્રવાસન વર્ષ’ તથા ‘સોમનાથ સ્વાભિમાન’ તરીકે ઊજવવાની જાહેરાત કરી હતી.

બજેટનું કુલ કદ રૂ. ચાર લાખ આઠ હજાર 53 કરોડ રહ્યું હતું, જે ગત વર્ષની સરખામણીમાં રૂ. 37 હજાર 803 કરોડ જેટલું વધારે છે. નાણાકીય વર્ષ માટે રૂ. 25 હજાર 587 કરોડની મહેસૂલી પુરાંત રહેશે.

અપેક્ષા મુજબ જ સ્થાનિક સ્વરાજ્યની ચૂંટણી પૂર્વે શહેરી વિસ્તારની સગવડ વધારવા તથા ગ્રામ્યક્ષેત્ર ઉપર ભાર મૂકવામાં આવ્યો છે.

અમદાવાદ-સાણંદ, ગાંધીનગર-કલોલ, સુરત-બારડોલી, વડોદરા-સાવલી તથા રાજકોટ હીરાસરને ટ્વિન સિટી તરીકે વિકસાવવી આ સ્થળોની વચ્ચે રૅપિડ રૅલ ટ્રાન્ઝિટ સિસ્ટમ શરૂ કરવામાં આવશે.

બજેટ પહેલાં ગુજરાત પ્રદેશ કૉંગ્રેસના પ્રમુખ અમિત ચાવડાએ માગ કરી હતી કે ‘પ્રજાના પરસેવાના ટૅક્સના પૈસાથી રાજ્ય સરકારનું બજેટ છે, ત્યારે પ્રજા માટે બજેટ હોવું જોઈએ. પોતાના માનીતા ઉદ્યોગપતિઓ, કૉન્ટ્રાક્ટરો કે પોતાની વાહવાહી માટે બજેટ ન હોવું જોઈએ. ખેડૂતોનું સંપૂર્ણ દેવું માફ થવું જોઈએ તથા તમામ પદો ઉપર કાયમી ભરતી થવી જોઈએ.’

દેસાઈના કહેવા પ્રમાણે, આ બજેટમાં GYAN ગરીબ, યુવા, અન્નદાતા (ખેડૂતો) તથા નારીશક્તિ ઉપર ભાર મૂકવામાં આવ્યો છે. ત્યારે આ બજેટમાં સમાજના અલગ-અલગ વર્ગને શું મળ્યું છે…

ગુજરાતની 48 ટકા વસતિ શહેરી વિસ્તારમાં રહે છે. શહેરી વિસ્તારોમાં વિકાસયોજનાઓ માટે રૂ. 16 હજાર 116 કરોડની ફાળવણી કરાઈ છે.

સાણંદ (અમદાવાદ), કલોલ (ગાંધીનગર), સાવલી (વડોદરા), બારડોલી (સુરત) અને રાજકોટ (હીરાસર)ને સેટેલાઇટ ટાઉન તરીકે વિકસાવવામાં આવશે તથા તેને રૅપિડ રેલ ટ્રાન્ઝિટ સિસ્ટમથી જોડવામાં આવશે.

બીબીસી માટે કલેક્ટિવ ન્યૂઝરૂમનું પ્રકાશન