ગુજરાત : આકરી ગરમીમાં ઠેર ઠેર માવઠું, કયા જિલ્લામાં હજુ પણ ભારે વરસાદની આગાહી?

અપડેટેડ 20 મિનિટ પહેલા

ગુજરાતમાં લોકોને ભયંકર ગરમીથી રાહત મળી હોય એમ શનિવાર સાંજથી રાજ્યના હવામાનમાં અચાનક પલટો જોવા મળ્યો હતો.

તેમાં પણ રવિવારે વહેલી સવારથી ઉનાળાની ગરમ સવારથી વિપરીત હળવી ઠંડક મહેસૂસ થઈ રહી હતી. વાદળછાયા વાતાવરણ અને વાદળોના ગડગડાટને કારણે ગમે ત્યારે વરસાદ તૂટી પડે એવું લાગી રહ્યું હતું.

હવામાન વિભાગે પણ રાજ્યના વાતાવરણમાં પલટો આવવાની આગાહી કરવાની સાથે આગામી દિવસોમાં ગાજવીજ સાથે ભારે વરસાદની શક્યતા વ્યક્ત કરી છે. આ સિવાય કેટલાંક સ્થળોએ કરા પડે એવી પણ આગાહી છે.

નોંધનીય છે કે ગુજરાતના અમદાવાદ, ગાંધીનગર, રાજકોટ, સુરેન્દ્રનગર, બનાસકાંઠા અને અરવલ્લીમાં અચાનક વાતાવરણમાં પલટો જોવા મળ્યો હતો.

અમદાવાના ગ્રામ્ય વિસ્તારો સહિત સુરેન્દ્રનગરનાં કેટલાંક ગામો સહિત અરવલ્લી અને બનાસકાંઠામાં પવન અને ગાજવીજ સાથે વરસાદ પડ્યો હતો.

આ ‘કમોસમી’ વરસાદને પગલે સમગ્ર ગુજરાતમાં ખેડૂતોને પોતાના પાક બચાવવા માટે સાવચેત રહેવા સૂચનાઓ પણ અપાઈ રહી છે.

ભારતના હવામાન વિભાગે જાહેર કરેલી માહિતી અનુસાર દરિયાની સપાટીથી 0.9 કિમીના અંતરે દક્ષિણ-પૂર્વ રાજસ્થાન અને તેની આસપાસના વિસ્તારો પર અપર ઍર સાયક્લૉનિક સર્ક્યુલેશન જોવા મળી રહ્યું છે.

દક્ષિણ-પૂર્વ રાજસ્થાન અને તેની આસપાસના વિસ્તારો પર જોવા મળી રહેલ સાયક્લૉનિક સર્ક્યુલેશનથી દક્ષિણ તામિલનાડુથી ગુજરાત, મહારાષ્ટ્ર, કર્ણાટકના કેટલાક અંતરિયાળ ભાગોમાં નીચા દબાણવાળો વિસ્તાર રચાયો છે.

જો આગાહીની વાત કરીએ તો 4 મેથી 10 મે સુધી ગુજરાતના મોટા ભાગના જિલ્લાઓમાં ગાજવીજ સાથે હળવાથી મધ્યમ વરસાદની આગાહી છે.

જોકે, 4 મેના રોજ ગુજરાતના બનાસકાંઠા, પાટણ, મહેસાણા, સાબરકાંઠા, અરવલ્લી, પંચમહાલ, દાહોદ, મહીસાગર, વડોદરા, છોટા ઉદેપુર, તાપી, વલસાડ, નવસારી, અમરેલી, ભાવનગર અને કચ્છના કેટલાક વિસ્તારોમાં 50 કિમી પ્રતિ કલાકની ઝડપે પવન ફૂંકાવાની તેમજ ગાજવીજ સાથે મધ્યમ વરસાદ પડવાની સંભાવના છે.

આવી જ રીતે 5 મેના રોજ અમદાવાદ, પાટણ, મહેસાણા, પંચમહાલ, આણંદ, ખેડા, ગાંધીનગર, વડોદરા, નર્મદા, ભરૂચ, સુરત, તાપી, વલસાડ, નવસારી, ડાંગ, સુરેન્દ્રનગર, જામનગર, પોરબંદર, ગીર સોમનાથ, દ્વારકા અને બોટાદ ખાતે ગાજવીજ સાથે છૂટોછવાયો મધ્યમ વરસાદ પડવાની સંભાવના છે.

બનાસકાંઠા, સાંબરકાંઠા, અરવલ્લી, મહીસાગર, દાહોદ, છોટા ઉદેપુર, રાજકોટ, જૂનાગઢ, અમરેલી, ભાવનગર, મોરબી અને કચ્છમાં 50 કિમીની ઝડપે પવનની સાથે છૂટોછવાયો વરસાદ અને કરા પડવાની સંભાવના પણ છે.

આ સિવાય 6 મેના રોજ ઉત્તર ગુજરાત અને સૌરાષ્ટ્ર-કચ્છમાં કેટલાંક સ્થળોએ ગાજવીજ સાથે છૂટોછવાયો વરસાદ તેમજ કરાવૃષ્ટિની પણ આગાહી છે.

7 અને 8 મેના રોજ ઉત્તર ગુજરાતના સાબરકાંઠા, બનાસકાંઠા, અરવલ્લી તેમજ સૌરાષ્ટ્રના અમરેલી, ભાવનગર સહિત નર્મદા અને સુરતમાં કેટલાંક સ્થળોએ છૂટોછવાયો પરંતુ ભારે વરસાદ પડવાની આગાહી છે.

ગત વર્ષ એટલે કે 2024ના ચોમાસા દરમિયાન પણ રાજ્યમાં સારો વરસાદ થયો હતો અને દેશમાં પણ સરેરાશ ચોમાસું સારું રહ્યું હતું.

આ વર્ષે હવામાન વિભાગના પૂર્વાનુમાન પ્રમાણે અને જે નક્શો જારી કર્યો છે, તે પ્રમાણે ગુજરાતમાં ચોમાસાના ચાર મહિના દરમિયાન સરેરાશ કરતાં વધારે વરસાદ થવાની શક્યતા છે.

ગુજરાતમાં ચોમાસાની શરૂઆત 15 જૂન બાદ થતી હોય છે અને તે બાદ સપ્ટેમ્બરના છેલ્લા અઠવાડિયા સુધી સામાન્ય રીતે વરસાદ થતો હોય છે.

આ ચાર મહિનામાં ગુજરાતમાં સૌરાષ્ટ્ર અને કચ્છમાં સરેરાશ કરતાં વધારે વરસાદની શક્યતા છે. આ ઉપરાંત નક્શા પ્રમાણે દક્ષિણ ગુજરાતમાં પ્રબળ શક્યતા છે કે સરેરાશ કરતાં વધારે વરસાદ થશે.

મધ્ય ગુજરાતમાં પણ આ વર્ષે એવી શક્યતા છે કે સરેરાશ કરતાં સારો વરસાદ થશે. જોકે, પૂર્વ ગુજરાત અને ઉત્તર ગુજરાતના કેટલાક વિસ્તારોમાં મૉડલ પ્રોપર સિગ્નલ આપતું નથી.

કેરળમાં જૂન મહિનાની 1 તારીખની આસપાસ ચોમાસું બેસે, ત્યાર બાદ ગુજરાત સુધી પહોંચતા આશરે 15થી 20 દિવસનો સમય લાગતો હોય છે.

બીબીસી માટે કલેક્ટિવ ન્યૂઝરૂમનું પ્રકાશન