Source :- EVARTHA NEWS
(adsbygoogle = window.adsbygoogle || []).push({});
ഇറാന് തലസ്ഥാനമായ ടെഹ്റാനില് യുഎസ്- ഇസ്രയേല് വ്യോമാക്രമണം. ഇന്ന് പുലര്ച്ചെ നഗരത്തില് പലയിടത്തും സ്ഫോടനങ്ങള് നടന്നതായാണ് റിപ്പോര്ട്ടുകള്. ഇറാന് പരമോന്നത നേതാവ് ആയത്തുല്ല അലി ഖമേനിയുടെ ഓഫീസിന് സമീപമാണ് ഒരു സ്ഫോടനം നടന്നത്. 86 വയസുകാരനായ ഖമേനി ആ സമയത്ത് ഓഫീസില് ഉണ്ടായിരുന്നോ എന്ന് വ്യക്തമല്ല.
അമേരിക്കയുമായി സംഘര്ഷം തുടരുന്ന സാഹചര്യത്തില് അദ്ദേഹം അടുത്തിടെ പൊതുവേദിയില് പ്രത്യക്ഷപ്പെട്ടിരുന്നില്ല. അതേസമയം, ഖമേനിയെ ടെഹ്റാനില് നിന്ന് മാറ്റിയതായും റിപ്പോര്ട്ടുകളുണ്ട്. ഇറാന്റെ ഭീഷണി ഒഴിവാക്കുന്നതിനായാണ് ആക്രമണം നടത്തിയതെന്ന് ഇസ്രായേല് പ്രതിരോധ മന്ത്രി ഇസ്രായേല് കാറ്റ്സ് പറഞ്ഞു. എന്നാല് ഇത് സംബന്ധിച്ച് കൂടുതല് വെളിപ്പെടുത്താന് അദ്ദേഹം തയ്യാറായില്ല. ടെഹ്റാനില് ശക്തമായ സ്ഫോടന ശബ്ദം കേട്ടതായി നാട്ടുകാര് പറഞ്ഞു.
ഇറാന്റെ ഔദ്യോഗിക ടെലിവിഷന് സ്ഫോടനത്തെക്കുറിച്ച് റിപ്പോര്ട്ട് ചെയ്തെങ്കിലും കാരണം വ്യക്തമാക്കിയിട്ടില്ല. അതേസമയം ഇസ്രായേലിലുടനീളം സൈറണുകള് മുഴങ്ങി. ഇസ്രായേലിലേക്ക് മിസൈലുകള് വിക്ഷേപിക്കാന് സാധ്യതയുള്ളതിനാല് പൊതുജനങ്ങളെ സജ്ജരാക്കാന് മുന്കൂര് മുന്നറിയിപ്പ് നല്കിയതാണെന്ന് ഇസ്രായേല് സൈന്യം അറിയിച്ചു.
ഇസ്രായേല് ആക്രമണം ആരംഭിച്ചതായി സ്ഥിരീകരിച്ചതിന് പിന്നാലെ ടെഹ്റാനില് കൂടുതല് സ്ഫോടനങ്ങള് നടന്നു. ആക്രമണത്തിലെ നാശനഷ്ടങ്ങളെക്കുറിച്ചോ ആളപായത്തെക്കുറിച്ചോ ഉള്ള വിവരങ്ങള് അധികൃതര് ഇതുവരെ പുറത്തുവിട്ടിട്ടില്ല. ഇസ്രായേല് ആക്രമണത്തിന് പിന്നാലെ ഇറാന് അവരുടെ വ്യോമപാത അടച്ചു. ടെഹ്റാനില് സ്ഫോടന ശബ്ദങ്ങള് മുഴങ്ങുന്നതിനിടെയാണ് പൈലറ്റുമാര്ക്ക് ജാഗ്രതാ നിര്ദ്ദേശം നല്കിയത്.
