நியூசிலாந்து 8 விக்கெட்டுகளை இழந்தது – வெற்றிக்கு அருகில் இந்தியா

புதுப்பிக்கப்பட்டது 6 நிமிடங்களுக்கு முன்னர்

நியூசிலாந்துக்கு எதிரான டி20 உலகக் கோப்பை இறுதிப் போட்டியில் 256 ரன்கள் வெற்றி இலக்காக நிர்ணயித்துள்ளது இந்தியா.

இந்த இலக்கை துரத்திய நியூசிலாந்து அணி 15.4 ஓவர்களில் 8 விக்கெட்டுகளை இழந்து 141 ரன்கள் மட்டுமே எடுத்துள்ளது.

16வது ஓவரின் மூன்றாவது மற்றும் நான்காவது பந்துகளில் இரண்டு நியூசிலாந்து பேட்ஸ்மேன்களை பும்ரா பெவிலியன் திருப்பி அனுப்பினார்.

நியூசிலாந்து கேப்டன் சாண்ட்னர் 36 ரன்கள் எடுத்து விளையாடி வருகிறார்.

13வது ஓவரில், அக்சர் படேல் இந்தியாவிற்கு மற்றொரு திருப்புமுனையை வழங்கினார். அவர் டேரில் மிட்செலை ஆட்டமிழக்கச் செய்தார். இது சாண்ட்னர் மற்றும் டேரில் மிட்செல் இடையேயான 52 ரன்கள் கூட்டணியை முறியடித்தது.

முன்னதாக, நியூசிலாந்து அணி 8.1 ஓவர்களில் 72 ரன்களுக்கு ஐந்து விக்கெட்டுகளை இழந்தது.

வருண் சக்ரவர்த்தி 26 பந்துகளில் 52 ரன்கள் எடுத்த டிம் சீஃபர்ட்டின் விக்கெட்டை வீழ்த்தினார்.

நான்காவது இடத்தில் பேட்டிங் செய்ய வந்த க்ளென் பிலிப்ஸை அக்சர் படேல் அவுட் ஆக்கினார்.

ஜஸ்பிரித் பும்ரா ரச்சின் ரவீந்திராவை ஒற்றை ரன்னில் பெவிலியன் திருப்பி அனுப்பினார்.

அக்சர் படேல் இந்தியாவுக்கு முதல் திருப்புமுனையை வழங்கினார். நியூசிலாந்து தொடக்க வீரர் ஃபின் ஆலனை 9 ரன்களுக்கு அவர் வீழ்த்தினார்.

முன்னதாக சஞ்சு, அபிஷேக் மற்றும் இஷான் கிஷன் ஆகியோரின் அரைசதங்களால், இந்தியா 20 ஓவர்களில் ஐந்து விக்கெட் இழப்புக்கு 255 ரன்கள் எடுத்தது.

நியூசிலாந்து வேகப்பந்து வீச்சாளர் நீஷம் நான்கு ஓவர்களில் 46 ரன்களுக்கு மூன்று விக்கெட்டுகளை வீழ்த்தினார்.

இந்திய அணியின் தொடக்க வீரர்களாக சஞ்சு சாம்சனும், அபிஷேக் சர்மாவும் களமிறங்கினர். இருப்பினும், முதல் ஓவரில் ஏழு ரன்களும், இரண்டாவது ஓவரில் ஐந்து ரன்களும் மட்டுமே எடுத்தனர்.

மூன்றாவது ஓவரில் சஞ்சுவும் அபிஷேக்கும் 15 ரன்கள் எடுத்து ரன் விகிதத்தை அதிகரித்தனர்.

நான்காவது ஓவரின் முதல் இரண்டு பந்துகளில் அபிஷேக் சர்மா பவுண்டரிகள் அடித்தார். இந்தியாவின் ஸ்கோர் நான்கு ஓவர்களில் விக்கெட் இழப்பின்றி 50 ரன்களைக் கடந்தது.

2026 டி20 உலகக் கோப்பையில் முதல் முறையாக, இந்திய தொடக்க வீரர்கள் 50 ரன்களுக்கு மேல் பார்ட்னர்ஷிப் அமைத்தனர்

அபிஷேக் சர்மா 18 பந்துகளில் தனது அரைசதத்தை எட்டினார். இந்தியாவின் ஸ்கோர் பவர்பிளேயில் 92 ரன்களை எட்டியது. இது டி20 உலகக் கோப்பை வரலாற்றில் பவர்பிளேயில் எடுக்கப்பட்ட அதிகபட்ச ஸ்கோராகும்.

இருப்பினும், எட்டாவது ஓவரின் முதல் பந்தில் ரச்சின் ரவீந்திராவின் பந்து வீச்சில் அபிஷேக் சர்மா ஆட்டமிழந்தார். அவர் 21 பந்துகளில் 52 ரன்கள் எடுத்திருந்தார்.

இஷான் கிஷனும் சஞ்சு சாம்சனும் ரன்களின் வேகத்தைக் குறைக்க விடவில்லை. அணியின் ஸ்கோர் 10 ஓவர்களில் 127 ரன்களை எட்டியது.

சஞ்சு சாம்சன் 33 பந்துகளில் அரைசதத்தை எட்டினார். இது சாம்சனின் தொடர்ச்சியான மூன்றாவது அரைசதமாகும். டி20 உலகக் கோப்பையின் இறுதி மற்றும் அரையிறுதி இரண்டிலும் அரைசதம் அடித்த மூன்றாவது வீரர் என்ற பெருமையையும் பெற்றார்.

14வது ஓவரின் கடைசி மூன்று பந்துகளில், ரச்சின் ரவீந்திராவின் பந்து வீச்சில் சஞ்சு சாம்சன் ஹாட்ரிக் சிக்ஸர்களை விளாசினார்.

இதற்கிடையில், இஷான் கிஷன் 23 பந்துகளில் தனது அரைசதத்தை எட்டினார். இருவரும் இரண்டாவது விக்கெட்டுக்கு 45 பந்துகளில் 100 ரன்கள் பார்ட்னர்ஷிப் அமைத்தனர். இந்தியாவின் ஸ்கோர் வெறும் 15 ஓவர்களில் 200 ரன்களைக் கடந்தது.

16வது ஓவரில் சஞ்சு, கிஷன் மற்றும் கேப்டன் சூர்யகுமார் யாதவ் ஆகியோரை வீழ்த்தி, நீஷம் நியூசிலாந்தை மீண்டும் ஆட்டத்திற்குக் கொண்டு வந்தார்.சஞ்சு சாம்சன் 89 ரன்களும், கிஷன் 54 ரன்களும் எடுத்தனர்.

இதற்கிடையில், கேப்டன் சூர்யகுமார் முதல் பந்திலேயே ரன் எடுக்காமல் ஆட்டமிழந்தார்.

ஹர்திக் பாண்ட்யாவும் நீண்ட நேரம் கிரீஸில் நீடிக்க முடியாமல் 13 பந்துகளில் 18 ரன்கள் எடுத்து அவுட்டானார்.

சிவம் துபே 8 பந்துகளில் 26 ரன்கள் எடுத்து இறுதியில் அதிரடி காட்டினார். திலக் வர்மா எட்டு ரன்கள் எடுத்தார். இருவரும் ஆட்டமிழக்காமல் இருந்தனர்.

“நாங்களில் முதலில் பேட்டிங் செய்வதை சிறப்பாக செய்துகொண்டிருப்பதால், இன்று முதலில் பேட்டிங் செய்வதில் மகிழ்ச்சி தான். அரையிறுதி மற்றும் இறுதிப் போட்டி போன்ற ஆட்டங்களில் முதலில் பேட்டிங் செய்த பெரிய ஸ்கோர் பதிவு செய்து எப்போதுமே நல்ல விஷயம்” என்று இந்திய கேப்டன் சூர்யகுமார் யாதவ் தெரிவித்தார்.

இந்திய அணியில் எந்த மாற்றமும் செய்யப்படவில்லை.

நியூசிலாந்து கேப்டன் சான்ட்னர், “இந்திய அணியில் நிறைய அதிரடி பேட்டர்கள் இருக்கிறார்கள். அவர்களை சேஸ் செய்யக்கூடிய ஒரு ஸ்கோருக்குள் கட்டுப்படுத்தவேண்டும்” என்று கூறினார்.

நியூசிலாந்து அணியில் ஆஃப் ஸ்பின்னர் ஆல்ரவுண்டர் கோல் மெக்கான்கீ நீக்கப்பட்டு வேகப்பந்துவீச்சாளர் ஜேக்கப் டஃபி சேர்க்கப்பட்டார்.

இந்தத் தொடரில் சேஸ் செய்த 4 போட்டிகளிலுமே நியூசிலாந்து வெற்றி பெற்றிருப்பது குறிப்பிடத்தக்கது.

இந்தியா: சஞ்சு சாம்சன் (விக்கெட் கீப்பர்), அபிஷேக் ஷர்மா, இஷான் கிஷன், சூர்யகுமார் யாதவ் (கேப்டன்), ஹர்திக் பாண்டியா, திலக் வர்மா, ஷிவம் துபே, அக்‌ஷர் பட்டேல், அர்ஷ்தீப் சிங், வருண் சக்கரவர்த்தி, ஜஸ்ப்ரித் பும்ரா.

நியூசிலாந்து: டிம் செய்ஃபர்ட் (விக்கெட் கீப்பர்), ஃபின் ஆலன், ரச்சின் ரவீந்திரா, மார்க் சேப்மேன், கிளென் ஃபிலிப்ஸ், டேரில் மிட்செல், ஜேம்ஸ் நீஷம், மிட்செல் சான்ட்னர், ஜேக்கப் டஃபி, மேட் ஹென்றி, லாக்கி ஃபெர்குசன்

இந்தப் போட்டிக்கு முன்பு நடந்த பத்திரிகையாளர் சந்திப்பில் பேசிய நியூசிலாந்து கேப்டன் மிட்செல் சான்ட்னர், “நாங்கள் வெற்றிபெற வாய்ப்புள்ள அணிகளில் ஒன்றாகக் கருதப்படவில்லை என்பது அனைவருக்கும் தெரியும். எனவே இது நிச்சயமாக ஒரு சவாலாகத்தான் இருக்கும். ஆனால் அதைப் பற்றி எங்களுக்குக் கவலையில்லை. நாங்கள் எங்களது நுணுக்கமான விஷயங்களைச் சரியாகச் செய்து, ஒரு அணியாகச் சிறப்பான பங்களிப்பை அளித்தால், கோப்பையை வெல்லக்கூடிய நல்ல நிலைக்கு எங்களால் செல்ல முடியும் என்று எங்களுக்குத் தெரியும். ஆம், கோப்பையை ஏந்துவதற்காகச் சிலரின் இதயங்களை உடைக்க வேண்டியிருந்தாலும் எனக்குப் பரவாயில்லை” என்று கூறினார்.

சனிக்கிழமையன்று பத்திரிகையாளர்களிடம் பேசிய இந்திய கேப்டன் சூர்யகுமார் யாதவ், “நாளை (மார்ச் 8) அணிக்குத் தலைமை தாங்குவது என்பது ஒரு சிறப்பான உணர்வு, அதுவும் இவ்வளவு அருமையான ஒரு அணியை இறுதிப்போட்டிக்கு வழிநடத்திச் செல்வது பெருமையாக இருக்கிறது. அதுவும் நம் சொந்த மண்ணில் நடப்பது இன்னும் சிறப்பு. நிச்சயமாகப் பதற்றமாகத்தான் இருக்கிறது, வயிற்றில் பட்டாம்பூச்சி பறப்பது போன்ற ஒரு உணர்வு ஏற்படுகிறது. ஆனால் நான் எப்போதும் சொல்வது போல, அழுத்தம் இல்லையென்றால் அதில் சுவாரஸ்யமே இருக்காது. அதனால் நான் மிகுந்த உற்சாகத்துடன் இருக்கிறேன்.” என்று கூறினார்.

இந்திய அணி குரூப் சுற்றில் விளையாடிய 4 போட்டிகளிலுமே வெற்றி பெற்று ஏ பிரிவில் முதலிடம் பிடித்தது. பாகிஸ்தான், அமெரிக்கா, நமீபியா மற்றும் நெதர்லாந்து அணிகளை இந்தியா வென்றது.

அடுத்து சூப்பர் 8 சுற்றில் இந்திய அணி தென்னாப்பிரிக்காவுக்கு எதிராக தோல்வியைச் சந்தித்தது. அடுத்ததாக வெஸ்ட் இண்டீஸ் மற்றும் ஜிம்பாப்வே அணிகளை வீழ்த்தி அரையிறுதிக்கு முன்னேறியது. அரையிறுதிக்கு இங்கிலாந்தை 7 ரன்கள் வித்தியாசத்தில் வீழ்த்தி சூர்யகுமார் யாதவின் அணி இறுதிப் போட்டிக்குத் தகுதி பெற்றது.

நியூசிலாந்து அணி குரூப் சுற்றில் ஆப்கானிஸ்தான், ஐக்கிய அரபு அமீரகம், கனடா ஆகிய அணிகளை வீழ்த்தியது. தென்னாப்பிரிக்காவுக்கு எதிராக தோற்றது. அதனால், 6 புள்ளிகளோடு டி பிரிவில் அந்த அணி இரண்டாவது இடம் பிடித்து சூப்பர் 8 சுற்றுக்கு முன்னேறியது.

சூப்பர் 8 சுற்றில் இலங்கையை வீழ்த்திய நியூசிலாந்து அணி இங்கிலாந்துக்கு எதிராகத் தோல்வியடைந்தது. பாகிஸ்தானுக்கு எதிரான போட்டி மழையால் கைவிடப்பட்டது. இந்த சுற்றில் 3 புள்ளிகள் பெற்ற நியூசிலாந்து, ரன்ரேட் அடிப்படையில் இரண்டாவது இடம் பிடித்து அரையிறுதிக்கு முன்னேறியது.

அரையிறுதியில் தென்னாப்பிரிக்காவை 9 விக்கெட்டுகள் வித்தியாசத்தில் வீழ்த்தி இறுதிப் போட்டிக்கு நியூசிலாந்து தகுதி பெற்றது.

2007: சாம்பியன் – இந்தியா, ரன்னர் அப் – பாகிஸ்தான்

2009: சாம்பியன் – பாகிஸ்தான், ரன்னர் அப் – இலங்கை

2010: சாம்பியன் – இங்கிலாந்து, ரன்னர் அப் – ஆஸ்திரேலியா

2012: சாம்பியன் – வெஸ்ட் இண்டீஸ், ரன்னர் அப் – இலங்கை

2014: சாம்பியன் – இலங்கை, ரன்னர் அப் – இந்தியா

2016: சாம்பியன் – வெஸ்ட் இண்டீஸ், ரன்னர் அப் – இங்கிலாந்து

2021: சாம்பியன் – ஆஸ்திரேலியா, ரன்னர் அப் – நியூசிலாந்து

2022: சாம்பியன் – இங்கிலாந்து, ரன்னர் அப் – பாகிஸ்தான்

2024: சாம்பியன் – இந்தியா, ரன்னர் அப் – தென்னாப்பிரிக்கா

தமிழ்நாடு தேர்தலை எதிர்கொள்ளும் இந்த தருணத்தில், உங்கள் பகுதியில் நிலவும் பிரச்னைகளை வெளிக்கொண்டு வருவதற்கான தளத்தை பிபிசி தமிழ் வழங்குகிறது.

உங்கள் பகுதியில் சாதிய பாகுபாடா? தீண்டாமை பிரச்னை குறித்து குரல் எழுப்பியும் அரசு மற்றும் அரசியல் கட்சிகள் நடவடிக்கை எடுக்கவில்லையா?

உங்கள் பிரச்னைகளை பிபிசி தமிழுடன் பகிருங்கள். அவற்றை செய்தியாக்கி அரசிடம் கொண்டு சேர்க்கலாம்.

கீழே கொடுக்கப்பட்டுள்ள இணைப்பில் உங்கள் பகுதியில் நிலவும் பிரச்னைகள் குறித்த தகவல்களை உள்ளீடு செய்யுங்கள்!

– இது, பிபிசிக்காக கலெக்டிவ் நியூஸ்ரூம் வெளியீடு