ઇઝરાયલે ગાઝામાં મેડિકલ સ્ટાફને મારી નાખ્યા હોવાનું સ્વીકાર્યું- ન્યૂઝ અપડેટ

અપડેટેડ 34 મિનિટ પહેલા

ઇઝરાયલી સેનાએ સ્વીકાર કર્યો છે કે 23મી માર્ચે દક્ષિણ ગાઝામાં 15 જેટલા મેડિકલ કર્મચારીની હત્યા મામલે તેમના સૈનિકોની ભૂલ હતી.

તે દિવસે રફાહની નજીક પેલેસ્ટિનિયન રેડ ક્રીસેન્ટ સોસાયટી(પીઆરસીએસ)ની ઍમ્બ્યુલન્સનો કાફલો, સંયુક્ત રાષ્ટ્રની એક કાર તથા ગાઝા સિવિલ ડિફેન્સની એક ટ્રક પર ગોળીબાર થયો હતો.

ઇઝરાયલે દાવો કર્ય હતો કે તેની સેનાએ આ હુમલો એટલા માટે કર્યો કે આ કાફલો વગર હેડલાઇટ કે ફ્લૅશ લાઇટ અંધારામાં સંદિગ્ઘ રીતે આગળ વધી રહ્યો હતો.

મૃતક સ્ટાફ પૈકી એકે તે વખતે મોબાઇલથી એક વીડિયો બનાવ્યો હતો. આ ફૂટેજથી ખબર પડી કે ઘાયલ લોકોની મદદ માટે બોલાવવામાં આવ્યા બાદ વાહનોની લાઇટ ચાલી રહી હતી.

ઇઝરાયલ સેનાનું કહેવું છે કે તે પૈકી ઓછામાં ઓછા છ સ્ટાફ હમાસ સાથે જોડાયેલા હતા. જોકે ઇઝરાયલે હજુ આ અંગે કોઈ પુરાવા નથી આપ્યા.

હવે ઇઝરાયલે કબૂલ કર્યું છે કે આ લોકો પાસે કોઈ હથિયાર નહોતા. તેણે એ પણ સ્વીકાર કર્યો છે કે તેને જે જાણકારી આપવામાં આવી હતી તે ખોટી હતી. ઇઝરાયલે કહ્યું હતું કે વગર લાઇટે ત્યાં વાહનો પહોંચ્યાં હતાં.

સંયુક્ત રાષ્ટ્રસંઘમાં વિશેષજ્ઞોના આંતરરાષ્ટ્રીય કાર્ય સમૂહ ઇન્ટરનૅશનલ સ્ટાન્ડર્ડ ઑફ એકાઉન્ટિંગ ઍન્ડ રિપોર્ટિંગ(આઈએસએઆર)માં ભારતને સર્વસંમતિથી ચૂંટી કાઢવામાં આવ્યું છે.

તેની જાણકારી સંયુક્ત રાષ્ટ્રસંઘમાં ભારતીય મિશને આપી. ભારતને વર્ષ 2025-26ના કાર્યકાળ માટે પસંદ કરવામાં આવ્યું છે.

આઈએસએઆર માટ ભારતને ચૂંટી કાઢ્યા બાદ ભારતીય મિશને લખ્યું, “ભારત વૈશ્વિક લેખાંકન માનકોના વિકાસ માટે પોતાનું યોગદાન આપવાનું યથાવત્ રાખશે.”

શું છે આઈએસએઆર?

સંયુક્ત રાષ્ટ્રસંઘની સંસ્થા આઈએસએઆર લેખાંકન અને રિપોર્ટિંગ ક્ષેત્રમાં કામ કરે છે. આ નીતિ-નિર્માતાઓ, નિયામકો, માનક-નિર્ધારકો અને ઍન્ટરપ્રાઇઝ એકાઉન્ટિંગ તથા રિપોર્ટિંગના ક્ષેત્રમાં પ્રમુખ વિશેષજ્ઞોનો એક વૈશ્વિક મંચ છે.

અમેરિકાના રાષ્ટ્રપતિ ડોનાલ્ડ ટ્રમ્પ સામે દેશમાં વિવિધ જગ્યાએ પ્રદર્શનો થઈ રહ્યાં છે. રાષ્ટ્રપતિનો કાર્યભાર સંભાળ્યા બાદ પહેલી વખત છે કે લોકોએ આટલી મોટી માત્રામાં વિરોધપ્રદર્શનો કર્યા હોય.

આ પ્રદર્શનો અમેરિકાનાં તમામ 50 રાજ્યોમાં લગભગ 1200 જગ્યાએ થઈ રહ્યાં છે. આ વિરોધપ્રદર્શનોને હેન્ડ્સ ઑફ નામ આપવામાં આવ્યું છે. જેનો અર્થ થાય છે કે ટ્રમ્પ લોકોના મામલે દખલ ન કરે.

પ્રદર્શનકારીઓએ સામાજીક અને આર્થિક મામલા સહિત અનેક મુદ્દે ટ્રમ્પના એજેન્ડા પર નારાજગી વ્યક્ત કરી છે. દુનિયાભરમાં ઘણા દેશો પર ટેરિફ લગાવ્યા બાદ અમેરિકાથી બહાર પણ વિરોધ થઈ રહ્યો છે. જેમાં લંડન, પેરિસ અને બર્લિન જેવાં શહેરો પણ સામેલ છે.

વકફ સંશોધન બિલ હવે કાયદાનું સ્વરૂપ ધારણ કરી ચૂક્યું છે. શનિવારે રાત્રે રાષ્ટ્રપતિએ તેને મંજૂરી આપી દીધી છે.

કેન્દ્ર સરકારે ગેઝેટ જારી કરીને તેની સૂચના આપી છે. જોકે, આ કાયદો ક્યારે લાગુ થશે તેની કોઈ જાણકારી નથી.

વકફ સંશોધન બિલ પર આ સપ્તાહે સંસદનાં બંને ગૃહોમાં તીખી ચર્ચાઓ થઈ હતી. લોકસભામાં આ બિલ બુધવારે રાત્રે અને રાજ્યસભામાં ગુરુવારે અડધીરાત્રે પસાર થયું હતું.

વકફ સંશોધન બિલને લઈને વિપક્ષનું કહેવું હતું કે આ લઘુમતિઓ પર હુમલો છે. આ બિલની સામે ત્રણ વિપક્ષી પાર્ટીઓના સાંસદોએ સુપ્રીમ કોર્ટમાં અરજી દાખલ કરી છે.

કૉંગ્રેસના કિશનગંજથી સાંસદ મોહમ્મદ જાવેદ, આમ આદમી પાર્ટીના ધારાસભ્ય અમાનતુલ્લાહ ખાન અને એઆઈએમઆઈએમના સાંસદ અસદુદ્દીન ઓવૈસીએ તેની સામે સુપ્રીમ કોર્ટમાં અપીલ કરી છે.

બીબીસી માટે કલેક્ટિવ ન્યૂઝરૂમનું પ્રકાશન

તમે બીબીસી ગુજરાતીને સોશિયલ મીડિયામાં Facebook પર , Instagram પર, YouTube પર, Twitter પર અને WhatsApp પર ફૉલો કરી શકો છો.