ਕੌਣ ਹੈ ਅਸ਼ੋਕ ਖਾਰਤ ਜਿਸ ਉੱਤੇ ਗਰਭਵਤੀ ਔਰਤ ਦੇ ਜਿਨਸੀ ਸ਼ੋਸ਼ਣ ਤੋਂ ਲੈ ਕੇ, ਔਰਤਾਂ ਨੂੰ ‘ਮੰਤਰ ਵਾਲਾ ਜਲ’ ਪਿਲਾਉਣ ਦੇ ਇਲਜ਼ਾਮ ਲੱਗੇ

ਇੱਕ ਅਜਿਹਾ ਮਾਮਲਾ ਸਾਹਮਣੇ ਆਇਆ ਹੈ ਜਿਸ ਨੇ ਸਭ ਨੂੰ ਹੈਰਾਨ ਕਰ ਦਿੱਤਾ ਹੈ, ਜਿੱਥੇ ਇੱਕ ਵਿਅਕਤੀ ਉੱਤੇ ਧਾਰਮਿਕ ਵਿਧੀਆਂ ਅਤੇ ਵਿਸ਼ਵਾਸ ਦੇ ਨਾਂ ‘ਤੇ ਗਰਭਵਤੀ ਔਰਤਾਂ ਨਾਲ ਜਿਨਸੀ ਸ਼ੋਸ਼ਣ ਦੇ ਗੰਭੀਰ ਇਲਜ਼ਾਮ ਲਗੇ ਹਨ।

ਇਸ ਮਾਮਲੇ ਵਿੱਚ ਹਰ ਦਿਨ ਨਵੇਂ ਖੁਲਾਸੇ ਅਤੇ ਹੈਰਾਨ ਕਰਨ ਦੇਣ ਵਾਲੀਆਂ ਜਾਣਕਾਰੀਆਂ ਸਾਹਮਣੇ ਆ ਰਹੀਆਂ ਹਨ।

ਮਹਾਰਾਸ਼ਟਰ ਸੂਬੇ ਦੇ ਇਸ ਮਾਮਲੇ ਵਿੱਚ ਮੁੱਖ ਮੁਲਜ਼ਮ ਅਸ਼ੋਕ ਖਰਾਤ ਦੇ ਖ਼ਿਲਾਫ਼ ਹੁਣ ਤੱਕ ਤਿੰਨ ਗੰਭੀਰ ਸ਼ਿਕਾਇਤਾਂ ਦਰਜ ਕੀਤੀਆਂ ਗਈਆਂ ਹਨ। ਇਨ੍ਹਾਂ ਸ਼ਿਕਾਇਤਾਂ ਵਿੱਚ ਦਾਅਵਾ ਕੀਤਾ ਗਿਆ ਹੈ ਕਿ ਉਹ ਧਾਰਮਿਕ ਵਿਧੀਆਂ ਦੀ ਆੜ ਵਿੱਚ ਔਰਤਾਂ ਦਾ ਜਿਨਸੀ ਸ਼ੋਸ਼ਣ ਕਰਦਾ ਰਿਹਾ ਹੈ।

ਮਾਮਲੇ ਦੀ ਗੰਭੀਰਤਾ ਨੂੰ ਦੇਖਦੇ ਹੋਏ ਪ੍ਰਸ਼ਾਸਨ ਨੇ ਇੱਕ ਵਿਸ਼ੇਸ਼ ਜਾਂਚ ਟੀਮ (ਐੱਸਆਈਟੀ) ਬਣਾਈ ਹੈ ਅਤੇ ਪੁਲਿਸ ਵੱਲੋਂ ਡੂੰਘਾਈ ਨਾਲ ਜਾਂਚ ਕੀਤੀ ਜਾ ਰਹੀ ਹੈ।

ਦੂਜੇ ਪਾਸੇ, ਇਸ ਮਾਮਲੇ ਵਿੱਚ ਲੱਗੇ ਇਲਜ਼ਾਮਾਂ ਬਾਰੇ ਮੁਲਜ਼ਮ ਦੇ ਵਕੀਲ ਅਤੇ ਪਰਿਵਾਰ ਦਾ ਪੱਖ ਜਾਣਨ ਦੀ ਕੋਸ਼ਿਸ਼ ਕੀਤੀ ਗਈ, ਪਰ ਕਈ ਵਾਰ ਸੰਪਰਕ ਕਰਨ ਦੇ ਬਾਵਜੂਦ ਕੋਈ ਜਵਾਬ ਨਹੀਂ ਮਿਲਿਆ।

ਖਰਾਤ ਦੇ ਖ਼ਿਲਾਫ਼ ਪਹਿਲੀ ਸ਼ਿਕਾਇਤ 17 ਮਾਰਚ ਨੂੰ ਦਰਜ ਕੀਤੀ ਗਈ ਸੀ, ਜਿਸ ਤੋਂ ਬਾਅਦ ਉਸਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ।

ਔਰਤ ਨੇ ਅਸ਼ੋਕ ਖਰਾਤ ਦੇ ਖ਼ਿਲਾਫ਼ ਸ਼ਿਕਾਇਤ ਦਰਜ ਕਰਾਈ ਸੀ, ਜਿਸ ਨੇ ਧਾਰਮਿਕ ਅਤੇ ਤਾਂਤ੍ਰਿਕ ਸ਼ਕਤੀਆਂ ਦਾ ਦਾਅਵਾ ਕਰਕੇ ਉਸ ਦਾ ਸ਼ੋਸ਼ਣ ਕੀਤਾ ਸੀ।

ਸ਼ਿਕਾਇਤਕਰਤਾ ਨੇ ਇਲਜ਼ਾਮ ਲਗਾਇਆ ਹੈ ਕਿ ਉਸ ਵਿਅਕਤੀ ਨੇ ਵਿਆਹ ਤੈਅ ਕਰਵਾਉਣ ਦੇ ਬਹਾਨੇ ਉਸ ਨੂੰ ਮਿਲਵਾਉਣ ਤੋਂ ਬਾਅਦ ਧਾਰਮਿਕ ਵਿਧੀਆਂ ਦਾ ਇਸਤੇਮਾਲ ਕਰਦੇ ਹੋਏ ਦੋ ਸਾਲ ਤੋਂ ਵੱਧ ਸਮੇਂ ਤੱਕ ਉਸ ਦਾ ਜਿਨਸੀ ਸ਼ੋਸ਼ਣ ਕੀਤਾ।

ਇਹ ਸ਼ਿਕਾਇਤ 17 ਮਾਰਚ, 2026 ਨੂੰ ਨਾਸਿਕ ਦੇ ਸਰਕਾਰਵਾੜਾ ਪੁਲਿਸ ਸਟੇਸ਼ਨ ਵਿੱਚ ਦਰਜ ਕੀਤੀ ਗਈ ਸੀ।

ਸ਼ਿਕਾਇਤਕਰਤਾ ਦੇ ਅਨੁਸਾਰ, ਉਸ ਦੀ ਮੁਲਾਕਾਤ ਮੁਲਜ਼ਮ ਨਾਲ ਜੁਲਾਈ 2021 ਵਿੱਚ ਹੋਈ ਸੀ। ਵਿਆਹ ਤੈਅ ਕਰਨ ਦੇ ਉਦੇਸ਼ ਨਾਲ ਸ਼ੁਰੂ ਹੋਈ ਇਸ ਮੁਲਾਕਾਤ ਦੌਰਾਨ, ਮੁਲਜ਼ਮ ਨੇ ਉਸ ਨੂੰ ਕਈ ਧਾਰਮਿਕ ਉਪਾਅ, ਤਾਬੀਜ਼ ਅਤੇ ਵਿਧੀਆਂ ਕਰਨ ਦੀ ਸਲਾਹ ਦਿੱਤੀ।

ਇਲਜ਼ਾਮ ਹੈ ਕਿ ਉਸ ਨੇ ਉਸ ਤੋਂ ਪੈਸੇ ਵੀ ਲਏ ਅਤੇ ਉਸਨੂੰ ਮੰਦਰ ਵਿੱਚ ਚੜ੍ਹਾਉਣ ਲਈ ਕਿਹਾ ਤਾਂ ਜੋ ਉਸਦਾ ਵਿਆਹ ਜਲਦੀ ਤੈਅ ਹੋ ਜਾਵੇ ਅਤੇ ਸਾਰੀਆਂ ਰੁਕਾਵਟਾਂ ਦੂਰ ਹੋ ਜਾਣ। ਸ਼ਿਕਾਇਤ ਵਿੱਚ ਕਿਹਾ ਗਿਆ ਹੈ ਕਿ ਮੁਲਜ਼ਮ ਨੇ ਇਸ ਦੌਰਾਨ ਉਸ ਤੋਂ ਇੱਕ ਲੱਖ ਰੁਪਏ ਤੋਂ ਵੱਧ ਦੀ ਰਕਮ ਲਈ।

ਇਸ ਤੋਂ ਬਾਅਦ ਔਰਤ ਦੀ ਮੰਗਣੀ ਨਵੰਬਰ 2022 ਵਿੱਚ ਹੋਈ ਅਤੇ ਉਸਦਾ ਵਿਆਹ 29 ਦਸੰਬਰ 2022 ਨੂੰ ਹੋਇਆ। ਹਾਲਾਂਕਿ, ਸ਼ਿਕਾਇਤ ਵਿੱਚ ਕਿਹਾ ਗਿਆ ਹੈ ਕਿ ਵਿਆਹ ਤੋਂ ਬਾਅਦ ਵੀ, ਮੁਲਜ਼ਮ ਉਸ ਨੂੰ ਵਾਰ-ਵਾਰ ਆਪਣੇ ਦਫ਼ਤਰ ਵਿੱਚ ਬੁਲਾਉਂਦਾ ਸੀ, ‘ਆਸ਼ੀਰਵਾਦ’ ਅਤੇ ‘ਵਿਵਾਹਿਕ ਜੀਵਨ ਵਿੱਚ ਆਉਣ ਵਾਲੀਆਂ ਰੁਕਾਵਟਾਂ ਨੂੰ ਦੂਰ ਕਰਨ’ ਦਾ ਬਹਾਨਾ ਬਣਾਉਂਦਾ ਸੀ।

ਇਹ ਇਲਜ਼ਾਮ ਲਗਾਇਆ ਗਿਆ ਹੈ ਕਿ ਇਹ ਮੁਲਾਕਾਤਾਂ ਸ਼ੁਰੂ ਵਿੱਚ ਧਾਰਮਿਕ ਵਿਧੀਆਂ ਦੇ ਨਾਮ ‘ਤੇ ਹੋਈਆਂ ਸਨ, ਪਰ ਬਾਅਦ ਵਿੱਚ ਇੱਕ ਗੰਭੀਰ ਰੂਪ ਲੈ ਗਈਆਂ।

ਔਰਤ ਦੀ ਸ਼ਿਕਾਇਤ ਦੇ ਅਨੁਸਾਰ, ਮੁਲਜ਼ਮ ਉਸਨੂੰ ਪ੍ਰਸਾਦ ਦੇ ਰੂਪ ਵਿੱਚ ਪੇੜਾ ਅਤੇ ਪਾਣੀ ਦਿੰਦਾ ਸੀ। ਇਸਨੂੰ ਖਾਣ ਤੋਂ ਬਾਅਦ ਉਸਨੂੰ ਚੱਕਰ ਆਉਣ ਲੱਗਦੇ ਸਨ ਜਾਂ ਉਹ ਅਰਧ-ਚੇਤਨਾ ਦੀ ਅਵਸਥਾ ਵਿੱਚ ਚਲੀ ਜਾਂਦੀ ਸੀ।

ਇਸ ਅਵਸਥਾ ਦਾ ਫਾਇਦਾ ਚੁੱਕ ਕੇ ਮੁਲਜ਼ਮ ਨੇ ਵਾਰ-ਵਾਰ ਉਸ ਦਾ ਜਿਨਸੀ ਸ਼ੋਸ਼ਣ ਕੀਤਾ। ਔਰਤ ਨੇ ਦੱਸਿਆ ਕਿ ਇਹ ਘਟਨਾ ਫਰਵਰੀ 2023 ਤੋਂ ਦਸੰਬਰ 2024 ਦੇ ਵਿਚਕਾਰ ਕਈ ਵਾਰ ਹੋਈ।

ਸ਼ਿਕਾਇਤ ਵਿੱਚ ਅੱਗੇ ਕਿਹਾ ਗਿਆ ਹੈ ਕਿ ਮੁਲਜ਼ਮ ਉਸਨੂੰ ਧਮਕੀ ਦਿੰਦਾ ਸੀ ਕਿ ਜੇ ਉਸ ਨੇ ਇਨ੍ਹਾਂ ਘਟਨਾਵਾਂ ਬਾਰੇ ਕਿਸੇ ਨੂੰ ਦੱਸਿਆ ਤਾਂ ਉਹ ਉਸ ਦਾ ਵਿਵਾਹਿਕ ਜੀਵਨ ਬਰਬਾਦ ਕਰ ਦੇਵੇਗਾ।

ਉਸ ਦਾ ਵਿਆਹ ਤੋੜ ਦੇਵੇਗਾ ਜਾਂ ਉਸਦੇ ਪਤੀ ਨੂੰ ਨੁਕਸਾਨ ਪਹੁੰਚਾਏਗਾ। ਉਸ ਨੇ ਕਿਹਾ ਹੈ ਕਿ ਇਸੇ ਡਰ ਕਾਰਨ ਉਹ ਲੰਬੇ ਸਮੇਂ ਤੱਕ ਚੁੱਪ ਰਹੀ। ਸ਼ਿਕਾਇਤ ਵਿੱਚ ਇਹ ਵੀ ਉਲੇਖ ਹੈ ਕਿ ਕੁਝ ਮੌਕਿਆਂ ‘ਤੇ ਮੁਲਜ਼ਮ ਦੇ ਕਹਿਣ ‘ਤੇ ਉਸਦੇ ਪਤੀ ਨੂੰ ਵੀ ਧਾਰਮਿਕ ਵਿਧੀਆਂ ਲਈ ਬੁਲਾਇਆ ਗਿਆ ਸੀ।

ਅੰਤ ਵਿੱਚ, ਇਸ ਸਥਿਤੀ ਨੂੰ ਸਹਿਨ ਨਾ ਕਰ ਸਕਣ ਕਾਰਨ ਔਰਤ ਨੇ ਆਪਣੇ ਰਿਸ਼ਤੇਦਾਰਾਂ ਨੂੰ ਇਸ ਬਾਰੇ ਦੱਸਿਆ ਅਤੇ ਉਨ੍ਹਾਂ ਦੀ ਮਦਦ ਨਾਲ ਪੁਲਿਸ ਸਟੇਸ਼ਨ ਪਹੁੰਚੀ। 17 ਮਾਰਚ, 2026 ਨੂੰ ਇਸ ਸੰਬੰਧ ਵਿੱਚ ਮਾਮਲਾ ਦਰਜ ਕਰਨ ਤੋਂ ਬਾਅਦ ਪੁਲਿਸ ਨੇ ਅਸ਼ੋਕ ਖਰਾਤ ਨੂੰ ਗ੍ਰਿਫ਼ਤਾਰ ਕਰ ਲਿਆ।

ਅਸ਼ੋਕ ਖਰਾਤ ਦੇ ਖ਼ਿਲਾਫ਼ 20 ਮਾਰਚ, 2026 ਦੀ ਰਾਤ ਨੂੰ ਇੱਕ ਹੋਰ ਸ਼ਿਕਾਇਤ ਦਰਜ ਕੀਤੀ ਗਈ। ਇੱਕ ਔਰਤ ਦੇ ਪਤੀ ਨੇ ਪੁਲਿਸ ਵਿੱਚ ਮਾਮਲਾ ਦਰਜ ਕਰਵਾਉਂਦੇ ਹੋਏ ਇਹ ਸ਼ਿਕਾਇਤ ਦਰਜ ਕਰਾਈ ਹੈ।

ਸ਼ਿਕਾਇਤ ਦੇ ਅਨੁਸਾਰ, ਔਰਤ ਨੇ ਇਲਜ਼ਾਮ ਲਗਾਇਆ ਹੈ ਕਿ ਮੁਲਜ਼ਮ ਖਰਾਤ ਨੇ ਗਰਭ-ਅਵਸਥਾ ਦੌਰਾਨ ਉਸ ਦਾ ਜਿਨਸੀ ਸ਼ੋਸ਼ਣ ਕੀਤਾ।

ਗਰਭ-ਅਵਸਥਾ ਦੌਰਾਨ ਖਰਾਤ ਨੇ ਪੂਜਾ-ਪਾਠ ਦੇ ਨਾਮ ‘ਤੇ ਔਰਤ ਦਾ ਜਿਨਸੀ ਸ਼ੋਸ਼ਣ ਕੀਤਾ। ਸ਼ਿਕਾਇਤ ਵਿੱਚ ਇਹ ਵੀ ਉਲੇਖ ਹੈ ਕਿ ਉਸਨੇ ਔਰਤ ਅਤੇ ਉਸਦੇ ਪਰਿਵਾਰ ਨੂੰ ਜਾਨੋਂ ਮਾਰਨ ਦੀ ਧਮਕੀ ਦਿੱਤੀ ਸੀ।

ਦੱਸਿਆ ਗਿਆ ਹੈ ਕਿ ਔਰਤ ਨਾਲ ਆਏ ਪਤੀ ਨੂੰ ਬਾਹਰ ਬਿਠਾਇਆ ਗਿਆ ਅਤੇ ਇੱਕ ਕਮਰੇ ਵਿੱਚ ਔਰਤ ਨਾਲ ਜਿਨਸੀ ਮਾੜਾ ਵਿਹਾਰ ਕੀਤਾ ਗਿਆ।

ਸ਼ਿਕਾਇਤ ਵਿੱਚ ਇਹ ਵੀ ਉਲੇਖ ਕੀਤਾ ਗਿਆ ਹੈ ਕਿ ਦੁਕਾਨਦਾਰ ਲੋਕਾਂ ਨੂੰ ਡਰਾਉਣ ਲਈ ਨਕਲੀ ਸੱਪ ਅਤੇ ਨਕਲੀ ਬਾਘ ਦੀ ਖਾਲ ਲਿਆ ਕੇ ਘਿਨੌਣੇ ਕਿਰਤ ਕਰ ਰਹੇ ਹਨ।

ਅਸ਼ੋਕ ਖਰਾਤ ਦੇ ਖ਼ਿਲਾਫ਼ ਜਿਨਸੀ ਸ਼ੋਸ਼ਣ ਦੇ ਨਾਲ-ਨਾਲ ਮਹਾਰਾਸ਼ਟਰ ਮਨੁੱਖੀ ਬਲੀ ਅਤੇ ਜਾਦੂ-ਟੋਨਾ ਨਿਵਾਰਣ ਐਕਟ ਦੀ ਧਾਰਾ 64(1), 74, 351(2) ਅਤੇ ਬੀਐੱਨਐੱਸ ਦੇ ਤਹਿਤ ਮਾਮਲਾ ਦਰਜ ਕੀਤਾ ਗਿਆ ਹੈ।

ਇੱਕ ਔਰਤ ਨੇ ਆਪਣੀ ਸ਼ਿਕਾਇਤ ਵਿੱਚ ਇਲਜ਼ਾਮ ਲਗਾਇਆ ਹੈ ਕਿ ਅਸ਼ੋਕ ਖਰਾਤ ਨੇ ਉਸ ਤੋਂ ਲੁੱਟਖੋਹ ਕੀਤੀ ਅਤੇ ਉਸਦੇ ਨਾਲ ਸਰੀਰਕ ਤੌਰ ‘ਤੇ ਮਾੜਾ ਵਤੀਰਾ ਕੀਤਾ। ਖਰਾਤ ਬਾਰੇ ਸੱਚ ਸਾਹਮਣੇ ਆਉਣ ਤੋਂ ਬਾਅਦ, 21 ਮਾਰਚ, 2026 ਨੂੰ ਇੱਕ ਤੀਜੀ ਔਰਤ ਨੇ ਪੁਲਿਸ ਨਾਲ ਸੰਪਰਕ ਕੀਤਾ ਅਤੇ ਸ਼ਿਕਾਇਤ ਦਰਜ ਕਰਾਈ।

ਸ਼ਿਕਾਇਤ ਵਿੱਚ ਕਿਹਾ ਗਿਆ ਹੈ ਕਿ ‘ਕੈਪਟਨ’ ਅਸ਼ੋਕ ਕੁਮਾਰ ਏਕਨਾਥ ਖਰਾਤ ਨੇ ਨਾ ਸਿਰਫ ਇਹ ਕਹਿ ਕੇ ਇੱਕ ਔਰਤ ਨੂੰ ਆਰਥਿਕ ਤੌਰ ‘ਤੇ ਧੋਖਾ ਦਿੱਤਾ ਕਿ “ਮੈਂ ਪੁਰਸ਼ ਅਵਤਾਰ ਹਾਂ ਅਤੇ ਤੁਸੀਂ ਪਿਛਲੇ ਜਨਮ ਦੀ ਅਪਸਰਾ ਹੋ”, ਬਲਕਿ ਉਸਨੂੰ ਦੈਵੀ ਸ਼ਕਤੀ ਨਾਲ ਡਰਾ ਕੇ ਵਾਰ-ਵਾਰ ਸਰੀਰਕ ਤੌਰ ‘ਤੇ ਤਸੀਹੇ ਵੀ ਦਿੱਤੇ।

ਔਰਤ ਵੱਲੋਂ ਸਰਕਾਰਵਾੜਾ ਪੁਲਿਸ ਸਟੇਸ਼ਨ ਵਿੱਚ ਦਰਜ ਕਰਾਈ ਗਈ ਸ਼ਿਕਾਇਤ ਦੇ ਅਨੁਸਾਰ, ਖਰਾਤ ਨੇ ਉਸ ਨੂੰ ਅਤੇ ਉਸਦੇ ਬੱਚਿਆਂ ਨੂੰ ਜਾਨੋਂ ਮਾਰਨ ਦੀ ਧਮਕੀ ਦੇਣ ਤੋਂ ਬਾਅਦ ਇਹ ਕਾਰਾ ਕੀਤਾ।

ਔਰਤ ਦੀ ਸ਼ਿਕਾਇਤ ਵਿੱਚ ਕਿਹਾ ਗਿਆ ਹੈ ਕਿ 2013 ਵਿੱਚ ਜਦੋਂ ਔਰਤ ਦੇ ਮਾਤਾ-ਪਿਤਾ ਉਸ ਦੇ ਵਿਆਹ ਲਈ ਜਗ੍ਹਾ ਲੱਭ ਰਹੇ ਸਨ, ਤਾਂ ਉਹ ਜਾਣ-ਪਛਾਣ ਵਾਲਿਆਂ ਦੀ ਸਲਾਹ ‘ਤੇ ਕੈਨੇਡਾ ਕਾਰਨਰ ਸਥਿਤ ਅਸ਼ੋਕ ਖਰਾਤ ਦੇ ਦਫ਼ਤਰ ਗਏ।

ਖਰਾਤ ਨੇ ਔਰਤ ਦੇ ਚਿਹਰੇ ਦੇ ਹਾਵ-ਭਾਵ ਵੇਖ ਕੇ ਭਵਿੱਖਬਾਣੀ ਕੀਤੀ ਕਿ ਉਸਦਾ ਵਿਆਹੁਤਾ ਜੀਵਨ ਸੁੱਖਾਂ ਨਾਲ ਭਰਿਆ ਹੋਵੇਗਾ।

ਵਿਆਹ ਤੋਂ ਬਾਅਦ, ਉਸਨੇ ਉਸਨੂੰ ਮਿਰਗਾਂਵ ਦੇ ਈਸ਼ਾਨੇਸ਼ਵਰ ਮੰਦਰ ਵਿੱਚ ਜਾ ਕੇ ਧਾਰਮਿਕ ਵਿਧੀਆਂ ਕਰਨ ਲਈ ਕਿਹਾ ਅਤੇ ਇਹ ਸ਼ਰਤ ਰੱਖੀ ਕਿ ਉਹ ਇਨ੍ਹਾਂ ਵਿਧੀਆਂ ਦੌਰਾਨ ਆਪਣੇ ਸਹੁਰੇ ਪਰਿਵਾਰ ਨੂੰ ਆਪਣੇ ਨਾਲ ਨਾ ਲੈ ਕੇ ਜਾਵੇ।

ਔਰਤ ਦਾ ਵਿਆਹ ਹੋ ਗਿਆ, ਪਰ ਕੁਝ ਸਮੇਂ ਬਾਅਦ ਉਸ ਦੇ ਆਪਣੇ ਪਤੀ ਨਾਲ ਝਗੜੇ ਹੋਣ ਲੱਗੇ, ਇਸ ਲਈ ਉਹ ਸਲਾਹ ਲੈਣ ਲਈ ਫਿਰ ਤੋਂ ਖਰਾਤ ਕੋਲ ਜਾਣ ਲੱਗੀ। ਫਰਵਰੀ 2020 ਵਿੱਚ ਖਰਾਤ ਨੇ ਕੈਬਿਨ ਦੇ ਬਾਹਰ ਔਰਤ ਦੀ ਮਾਂ ਨੂੰ ਰੋਕਿਆ ਅਤੇ ਉਸਨੂੰ ਇਕੱਲੇ ਬੁਲਾਇਆ।

ਉਸਨੇ ਔਰਤ ਨਾਲ ਮਾੜੀ ਭਾਸ਼ਾ ਦਾ ਇਸਤੇਮਾਲ ਕਰਦੇ ਹੋਏ ਕਿਹਾ, “ਮੈਂ ਪਰਮ ਪੁਰਸ਼ ਹਾਂ, ਮੈਨੂੰ ਤਿੰਨਾਂ ਯੁਗਾਂ ਦਾ ਗਿਆਨ ਹੈ, ਤੁਹਾਡਾ ਤਲਾਕ ਅੰਤਿਮ ਹੈ ਅਤੇ ਤੁਸੀਂ ਪਿਛਲੇ ਜਨਮ ਦੀ ਅਪਸਰਾ ਹੋ।”

ਸ਼ਿਕਾਇਤ ਵਿੱਚ ਕਿਹਾ ਗਿਆ ਹੈ ਕਿ ਜਦੋਂ ਔਰਤ ਨੇ ਵਿਰੋਧ ਕੀਤਾ ਤਾਂ ਉਸਨੇ ਉਸਨੂੰ ਭਵਿੱਖ ਦਾ ਡਰ ਦਿਖਾ ਕੇ ਚੁੱਪ ਕਰਾਉਣ ਦੀ ਕੋਸ਼ਿਸ਼ ਕੀਤੀ।

ਔਰਤ ਨੇ ਆਪਣੀ ਸ਼ਿਕਾਇਤ ਵਿੱਚ ਕਿਹਾ ਹੈ ਕਿ ਅਕਤੂਬਰ 2021 ਵਿੱਚ ਤਲਾਕ ਤੋਂ ਬਾਅਦ ਉਹ ਤਣਾਅ ਵਿੱਚ ਸੀ। ਮਈ 2022 ਵਿੱਚ ਖਰਾਤ ਨੇ ਉਸ ਨੂੰ ਫੋਨ ਕੀਤਾ ਅਤੇ ਆਪਣੇ ਦਫ਼ਤਰ ਵਿੱਚ ਬੁਲਾਇਆ।

ਉੱਥੇ ਉਸਨੇ ਧਮਕੀ ਦਿੰਦੇ ਹੋਏ ਕਿਹਾ, “ਮੈਂ ਤੁਹਾਡੇ ਨਾਲ ਵਿਆਹ ਕਰਨ ਜਾ ਰਿਹਾ ਹਾਂ, ਜੇ ਤੁਸੀਂ ਆਪਣਾ ਭਵਿੱਖ ਸੁਧਾਰਨਾ ਚਾਹੁੰਦੇ ਹੋ, ਤਾਂ ਤੁਹਾਨੂੰ ਮੇਰੀ ਗੱਲ ਮੰਨਣੀ ਪਵੇਗੀ, ਨਹੀਂ ਤਾਂ ਮੈਂ ਤੁਹਾਡੇ ਨਾਲ ਨਾਰਾਜ਼ ਹੋ ਜਾਵਾਂਗਾ।”

ਫਿਰ ਉਸਨੇ ਉਸਨੂੰ ਤਾਂਬੇ ਦੀ ਬੋਤਲ ਵਿੱਚੋਂ ‘ਮੰਤਰਯੁਕਤ ਜਲ’ ਪਿਆਇਆ ਅਤੇ ਜਬਰਦਸਤੀ ਉਸਦੇ ਨਾਲ ਜਿਨਸੀ ਸੰਬੰਧ ਬਣਾਏ।

ਸ਼ਿਕਾਇਤ ਵਿੱਚ ਕਿਹਾ ਗਿਆ ਹੈ ਕਿ ਖਰਾਤ ਨੇ ਉਸਦੇ ਨਾਲ 3 ਤੋਂ 4 ਵਾਰ ਸਰੀਰਕ ਤੌਰ ‘ਤੇ ਮਾੜਾ ਵਿਹਾਰ ਕੀਤਾ, ਜਿਸ ਕਾਰਨ ਉਹ ਗਰਭਵਤੀ ਹੋ ਗਈ।

ਇਹ ਸਭ ਦੱਸਣ ਤੋਂ ਬਾਅਦ ਉਸਨੇ ਉਸਨੂੰ ਕੁਝ ਗੋਲੀਆਂ ਦਿੱਤੀਆਂ, ਜਿਸ ਨਾਲ ਉਸਦਾ ਗਰਭਪਾਤ ਹੋ ਗਿਆ। ਉਸਨੇ ਬੈਂਕਿੰਗ ਕੰਮ ਦਾ ਬਹਾਨਾ ਬਣਾ ਕੇ ਉਸਦੇ ਪਰਿਵਾਰ ਦਾ ਆਧਾਰ ਕਾਰਡ ਅਤੇ ਪੈਨ ਕਾਰਡ ਵੀ ਲੈ ਲਿਆ ਅਤੇ ਉਸ ਦੇ ਮੋਬਾਈਲ ‘ਤੇ ਆਏ ਓਟੀਪੀ ਨੂੰ ਲੈ ਕੇ ਉਸ ਨਾਲ ਆਰਥਿਕ ਧੋਖਾਧੜੀ ਕੀਤੀ।

ਇਹ ਵੀ ਉਲੇਖ ਹੈ ਕਿ ਉਸਨੇ ‘ਜਾਦੂਈ ਜੜੀ-ਬੂਟੀਆਂ’ ਦੇਣ ਦੇ ਬਹਾਨੇ 12,500 ਰੁਪਏ ਲੈ ਲਏ।

18 ਮਾਰਚ 2026 ਨੂੰ ਇੱਕ ਸਥਾਨਕ ਅਖ਼ਬਾਰ ਵਿੱਚ ਖ਼ਬਰ ਛਪੀ ਕਿ ਅਸ਼ੋਕ ਖਰਾਤ ਨੇ ਇਸੇ ਤਰ੍ਹਾਂ ਕਈ ਹੋਰ ਔਰਤਾਂ ਦਾ ਵੀ ਸ਼ੋਸ਼ਣ ਕੀਤਾ ਸੀ। ਇਹ ਖ਼ਬਰ ਪੜ੍ਹ ਕੇ ਔਰਤ ਨੇ ਹਿੰਮਤ ਜੁਟਾਈ ਅਤੇ ਪੁਲਿਸ ਸਟੇਸ਼ਨ ਪਹੁੰਚੀ।

ਉਸਨੇ ਆਪਣੀ ਸ਼ਿਕਾਇਤ ਵਿੱਚ ਕਿਹਾ ਹੈ ਕਿ ਉਹ ਹੁਣ ਤੱਕ ਇਸ ਲਈ ਚੁੱਪ ਰਹੀ ਕਿਉਂਕਿ ਉਸਨੂੰ ਡਰ ਸੀ ਕਿ “ਤੁਹਾਡੇ ਬੱਚਿਆਂ ਨਾਲ ਕੁਝ ਬੁਰਾ ਹੋ ਜਾਵੇਗਾ।”

ਜਦੋਂ ਪੁਲਿਸ ਨੇ ਖਰਾਤ ਦੇ ਦਫ਼ਤਰ ‘ਤੇ ਛਾਪਾ ਮਾਰਿਆ, ਤਾਂ ਉੱਥੋਂ ਕਈ ਇਤਰਾਜ਼ਯੋਗ ਸਬੂਤ ਬਰਾਮਦ ਹੋਏ। ਪੁਲਿਸ ਸਰੋਤਾਂ ਦੇ ਅਨੁਸਾਰ, ਇੱਕ ਪੈਨ ਡਰਾਈਵ ਜ਼ਬਤ ਕੀਤੀ ਗਈ ਅਤੇ ਉਸ ਵਿੱਚ ਕਈ ਇਤਰਾਜ਼ਯੋਗ ਵੀਡੀਓ ਅਤੇ ਸੀਸੀਟੀਵੀ ਫੁਟੇਜ ਮਿਲੇ। ਹੋਰ ਦਸਤਾਵੇਜ਼ ਵੀ ਜ਼ਬਤ ਕੀਤੇ ਗਏ ਹਨ।

ਨਾਸਿਕ ਪੁਲਿਸ ਕਮਿਸ਼ਨਰ ਸੰਦੀਪ ਕਰਨਿਕ ਦੇ ਆਦੇਸ਼ ‘ਤੇ ਖਰਾਤ ਦੇ ਖ਼ਿਲਾਫ਼ ਭਾਰਤੀ ਦੰਡ ਸੰਹਿਤਾ (ਆਈਪੀਸੀ) ਦੀ ਧਾਰਾ 64(1), 74, 352, 351(1) ਦੇ ਨਾਲ-ਨਾਲ ਮਹਾਰਾਸ਼ਟਰ ਮਨੁੱਖੀ ਬਲੀ ਅਤੇ ਹੋਰ ਅਮਾਨਵੀ, ਅਘੋਰੀ ਪ੍ਰਥਾਵਾਂ ਅਤੇ ਜਾਦੂ-ਟੋਨਾ ਨਿਵਾਰਣ ਐਕਟ ਦੇ ਤਹਿਤ ਮਾਮਲਾ ਦਰਜ ਕੀਤਾ ਗਿਆ ਹੈ।

ਪੁਲਿਸ ਹੁਣ ਮਾਮਲੇ ਦੇ ਤਕਨੀਕੀ ਸਬੂਤਾਂ ਅਤੇ ਹੋਰ ਪੱਖਾਂ ਦੀ ਜਾਂਚ ਕਰ ਰਹੀ ਹੈ। ਵੱਖ-ਵੱਖ ਟੀਮਾਂ ਵੱਲੋਂ ਹਰ ਕੋਣ ਤੋਂ ਜਾਂਚ ਕੀਤੀ ਜਾ ਰਹੀ ਹੈ। ‘ਕੈਪਟਨ’ ਅਸ਼ੋਕ ਖਰਾਤ ਦੀਆਂ ਜਾਇਦਾਦਾਂ ‘ਤੇ ਤਲਾਸ਼ੀ ਮੁਹਿੰਮ ਜਾਰੀ ਹੈ।

ਨਾਸਿਕ ਪੁਲਿਸ ਨੇ ਸਿੰਨਰ ਦੇ ਮੀਰਗਾਂਵ ਸਥਿਤ ਇੱਕ ਫਾਰਮ ਹਾਊਸ ਦਾ ਨਿਰੀਖਣ ਕੀਤਾ। ਈਸ਼ਾਨੇਸ਼ਵਰ ਮੰਦਰ ਅਤੇ ਕਾਟੇਜ ਦਾ ਵੀ ਨਿਰੀਖਣ ਕੀਤਾ ਗਿਆ। ਕਈ ਨੇਤਾ ਅਤੇ ਕਲਾਕਾਰ ਇਸ ਥਾਂ ‘ਤੇ ਅਕਸਰ ਆਉਂਦੇ-ਜਾਂਦੇ ਸਨ ਅਤੇ ਇਸ ਮਾਮਲੇ ਵਿੱਚ ਵੀ ਜਾਂਚ ਜਾਰੀ ਹੈ।

ਇਸ ਸੰਬੰਧ ਵਿੱਚ ਸੀਨੀਅਰ ਪੁਲਿਸ ਇੰਸਪੈਕਟਰ ਅੰਚਲ ਮੁਦਗਲ ਨੇ ਦੱਸਿਆ ਕਿ ਸ਼ਿਕਾਇਤਕਰਤਾ ਔਰਤ ਦੀ ਸ਼ਿਕਾਇਤ ‘ਤੇ ਅਸ਼ੋਕ ਖਰਾਤ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ ਅਤੇ ਅੱਗੇ ਦੀ ਜਾਂਚ ਜਾਰੀ ਹੈ।

ਅਸ਼ੋਕ ਖਰਾਤ ਇਸ ਵੇਲੇ ਨਾਸਿਕ ਪੁਲਿਸ ਦੀ ਹਿਰਾਸਤ ਵਿੱਚ ਹੈ ਅਤੇ ਅੱਗੇ ਦੀ ਜਾਂਚ ਜਾਰੀ ਹੈ।

ਖਰਾਤ ਦੇ ਪਰਿਵਾਰ ਅਤੇ ਵਕੀਲਾਂ ਨਾਲ ਸੰਪਰਕ ਕਰਨ ਦੇ ਯਤਨ ਅਸਫ਼ਲ ਰਹੇ। ਉਨ੍ਹਾਂ ਦੇ ਘਰ ਜਾ ਕੇ ਵੀ ਕੋਈ ਜਵਾਬ ਨਹੀਂ ਮਿਲਿਆ।

ਅਧਿਕਾਰਕ ਪ੍ਰਤੀਕਿਰਿਆ ਮਿਲਣ ‘ਤੇ ਖ਼ਬਰ ਨੂੰ ਅਪਡੇਟ ਕੀਤਾ ਜਾਵੇਗਾ।

22 ਮਾਰਚ, 2025 ਨੂੰ ਪੁਲਿਸ ਪੁੱਛਗਿੱਛ ਦੌਰਾਨ ਬਾਹਰ ਆਉਣ ਤੋਂ ਬਾਅਦ ਖਰਾਤ ਨੇ ਕਿਹਾ, “ਨਾਸਿਕ ਜ਼ਿਲ੍ਹਾ ਕਾਨੂੰਨ ਦਾ ਗੜ੍ਹ ਹੈ। ਮੇਰੇ ਵਿੱਚ ਚੱਲਣ ਦੀ ਤਾਕਤ ਨਹੀਂ ਬਚੀ ਹੈ।”

ਵਿਰੋਧੀ ਧਿਰ ਅਸ਼ੋਕ ਖਰਾਤ ਮਾਮਲੇ ਨੂੰ ਲੈ ਕੇ ਸਰਕਾਰ ਦੀ ਆਲੋਚਨਾ ਕਰ ਰਹੀ ਹੈ। ਇਸਦਾ ਅਸਰ ਬਜਟ ਸੈਸ਼ਨ ‘ਤੇ ਵੀ ਪਿਆ।

ਮੁੱਖ ਮੰਤਰੀ ਦੇਵੇਂਦਰ ਫਡਣਵੀਸ ਨੇ ਸਦਨ ਨੂੰ ਦੱਸਿਆ ਕਿ ਪੁਲਿਸ ਨੇ ਇਸ ਮਾਮਲੇ ਵਿੱਚ ਤੁਰੰਤ ਕਾਰਵਾਈ ਕੀਤੀ ਹੈ। ਜਾਲ ਵਿਛਾ ਕੇ ਕਾਰਵਾਈ ਕੀਤੀ ਗਈ। ਉਨ੍ਹਾਂ ਔਰਤਾਂ ਨੂੰ ਧੀਰਜ ਨਾਲ ਸਾਹਮਣੇ ਲਿਆਂਦਾ ਜਾ ਰਿਹਾ ਹੈ।

ਕੁਝ ਔਰਤਾਂ ਨੇ ਸ਼ਿਕਾਇਤਾਂ ਦਰਜ ਕਰਾਈਆਂ ਹਨ ਅਤੇ ਅੱਗੇ ਹੋਰ ਵੀ ਸ਼ਿਕਾਇਤਾਂ ਆਉਣ ਦੀ ਸੰਭਾਵਨਾ ਹੈ।

ਇਹ ਮਾਮਲਾ ਰਾਜਨੀਤੀ ਦਾ ਨਹੀਂ, ਸਗੋਂ ਔਰਤਾਂ ਦੀ ਇਜ਼ਤ ਦਾ ਹੈ। ਔਰਤਾਂ ਦਾ ਸ਼ੋਸ਼ਣ ਕੀਤਾ ਗਿਆ ਅਤੇ ਉਨ੍ਹਾਂ ਨੂੰ ਗਲਤ ਗੱਲਾਂ ਮੰਨਣ ਲਈ ਮਜਬੂਰ ਕੀਤਾ ਗਿਆ। ਮੁੱਖ ਮੰਤਰੀ ਨੇ ਕਿਹਾ ਕਿ ਇਸ ਸੰਬੰਧ ਵਿੱਚ ਸਦਨ ਵਿੱਚ ਜਲਦੀ ਹੀ ਵਿਸਥਾਰਿਤ ਬਿਆਨ ਦਿੱਤਾ ਜਾਵੇਗਾ।

ਬੀਬੀਸੀ ਲਈ ਕਲੈਕਟਿਵ ਨਿਊਜ਼ਰੂਮ ਵੱਲੋਂ ਪ੍ਰਕਾਸ਼ਿਤ